ხუთშაბათს ჩრდილოეთ ისრაელში, ავტობუსის გაჩერებაზე მანქანის შევარდნის შედეგად ათი ადამიანი დაშავდა, მათგან ერთ-ერთი, 17 წლის მოზარდი, თავის ტრავმის გამო კრიტიკულ მდგომარეობაშია. ადგილობრივი სასწრაფო დახმარების სამსახურების ცნობით, საერთო ჯამში, ორ ადამიანს აქვს მძიმე ჭრილობები. ისრაელის პოლიციამ განაცხადა, რომ სავარაუდო თავდამსხმელს ნაციონალისტური მოტივები ჰქონდა და რომ ის იყო 53 წლის პალესტინელი ჯენინიდან, რომელიც ისრაელის მიერ ოკუპირებულ დასავლეთ სანაპიროზე მდებარეობს. ის ისრაელში ნებართვის გარეშე იმყოფებოდა. წინასწარი დასკვნები მიუთითებს, რომ ის განზრახ დაესხა თავს მშვიდობიან მოქალაქეებს, რომლებიც ელოდებოდნენ ტრანსპორტს ჰაიფის სამხრეთით, კარკურის გზაჯვარედინზე, - ნათქვამია ისრაელის პოლიციის განცხადებაში. პოლიციამ თქვა, რომ "გაანეიტრალა" თავდამსხმელი. ხელისუფლებას დამატებითი დეტალები არ გაუვრცელებია. ზოგიერთი ინფორმაციის თანახმად, სავარაუდო დამნაშავე გაქცევას ცდილობდა და პოლიციამ მას ცეცხლი გაუხსნა. სააგენტო Reuters-ი აღნიშნავს ძალადობის მკვეთრ ზრდას დასავლეთ სანაპიროზე, რომლის ჩრდილოეთ ნაწილში ისრაელმა კვირას, პირველად 20 წელზე მეტი ხნის განმავლობაში, გაგზავნა ტანკები და უბრძანა სამხედროებს, მოემზადონ ამ მხარეში ხანგრძლივი ყოფნისთვის, რათა დაუპირისპირდნენ ლტოლვილთა ბანაკებში მყოფ რადიკალურ ისლამისტებს. ისრაელმა ღაზის სექტორში ჰამასის წინააღმდეგ ფართომასშტაბიანი სამხედრო ოპერაცია დაიწყო მას შემდეგ, რაც 2023 წლის 7 ოქტომბერს პალესტინელთა რადიკალური მოძრაობის სამხედრო ფრთის დაჯგუფებები თავს დაესხნენ ისრაელის სამხრეთს, 1200 ადამიანი მოკლეს და 250-ზე მეტი მძევლად აიყვანეს. პალესტინური მხარის ინფორმაციით, 2023 წლის ოქტომბრიდან ღაზის სექტორში დაღუპულია 47 000-მდე ადამიანი. მილიონზე მეტი დევნილად იქცა. საომარი მოქმედებების და ბლოკადის გამო სამოქალაქო მოსახლეობა ჰუმანიტარულ კატასტროფაში აღმოჩნდა. გაეროს მონაცემებით, ღაზის სექტორში დანგრეული ან დაზიანებულია სახლების 92%. ...