თურქეთი, რომელსაც აშშ-ის შემდეგ ნატოში სიდიდით მეორე არმია ჰყავს, ღიაა იმისთვის, რომ საკუთარი სამხედრო დანაყოფი გაგზავნოს უკრაინაში შესაძლო სამშვიდობო მისიის ნაწილად. ამის შესახებ ხუთშაბათს წყაროებზე დაყრდნობით იუწყება სააგენტო Bloomberg-ი. სააგენტოს ანონიმმა თანამოსაუბრეებმა აღნიშნეს, რომ თურქეთის პრეზიდენტმა რეჯეპ ტაიპ ერდოანმა ეს თემა განიხილა უკრაინის პრეზიდენტ ვოლოდიმირ ზელენსკისთან და რუსეთის საგარეო საქმეთა მინისტრ სერგეი ლავროვთან, თებერვლის დასაწყისში ანკარაში გამართული ცალკეული შეხვედრების დროს. მანამდე აშშ-ის პრეზიდენტმა დონალდ ტრამპმა, რომელიც რუსეთთან კონტაქტების დამყარებას ცდილობს, მათ შორის უკრაინაში ომის დასრულების სამშვიდობო ძალისხმევის ფარგლებში, განაცხადა, რომ მხარს დაუჭერს ევროპელი მოკავშირეების მონაწილეობას სამშვიდობო ძალებში და უზრუნველყოფს უკრაინის უსაფრთხოების გარანტიებს, მაგრამ გამორიცხავს სამშვიდობო მისიაში თავად შეერთებული შტატების უშუალო როლს. რუსეთი კვლავ ეწინააღმდეგება უკრაინაში ევროპის სამშვიდობო ძალების გაგზავნის იდეას. ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა კატარში ვიზიტის დროს გამართულ პრესკონფერენციაზე. ლავროვის თქმით, რუსეთისთვის ამჟამად არავის უკითხავს უკრაინაში სამშვიდობოების განლაგების შესაძლებლობის შესახებ, თუმცა, როგორც მინისტრმა აღნიშნა, აშშ-ის პრეზიდენტმა დონალდ ტრამპმა საფრანგეთის პრეზიდენტ ემანუელ მაკრონთან ბოლო შეხვედრაზე განაცხადა, რომ სამშვიდობო ძალების განლაგება შესაძლებელია მხოლოდ კონფლიქტის ორივე მხარის თანხმობით. ასევე ნახეთ ლავროვმა კვლავ გამორიცხა უკრაინაში სამშვიდობო ჯარების გაგზავნის შესაძლებლობა ასევე ნახეთ ტრამპი ამბობს, რომ პუტინი თანახმაა უკრაინაში ევროპელი ჯარისკაცების განთავსებაზე. კრემლი ამას ეჭვქვეშ აყენებს ...