ამ შემთხვევაში მიზეზი სახელწოდებაა - რეესტრში ფიქრობენ, რომ მოთხოვნილი სახელით („საჯარო მოსამსახურეთა დამოუკიდებელი პროფესიული კავშირი - კონსტიტუციის 78-ე მუხლი“) რეგისტრაციის შემთხვევაში, გაერთიანების სახელწოდებამ „შეიძლება შეცდომაში შეიყვანოს მესამე პირი“. „უკვე მეშვიდედ, ჩვენ გვითხრეს უარი. საბაბები, რომლებიც საჯარო რეესტრმა და იუსტიციის სამინისტრომ გამოაცხადეს, სამართლებრივად ყოვლად მიუღებელია. ამიტომ გავგზავნეთ განცხადება შრომის საერთაშორისო ორგანიზაციაში და მოვითხოვთ შესაბამის რეაგირებას“, - თქვა პროფკავშირების ერთ-ერთმა დამფუძნებელმა კახი სამხარაძემ არასამთავრობო ორგანიზაცია „საერთაშორისო გამჭვირვალობა-საქართველოში“ გამართულ ბრიფინგზე. ყოფილ და მოქმედ საჯარო მოხელეებს, რომლებსაც პროფკავშირის დაფუძნება სურთ, სამართლებრივ დახმარებას „საერთაშორისო გამჭვირვალობა-საქართველო“ უწევს. ორგანიზაციის ხელმძღვანელი ეკა გიგაური ფიქრობს, რომ საჯარო რეესტრმა პოლიტიკურად მოტივირებული გადაწყვეტილება მიიღო. საჯარო მოსამსახურეთა დამოუკიდებელმა პროფკავშირმა რეესტრიდან ბოლო უარი 24 თებერვალს მიიღო. მასში წერია, რომ უკვე არსებობს სამი ორგანიზაცია, რომლებსაც საჯარო მოხელეთა მიერ მოთხოვნილი სახელის მსგავსი სახელები აქვთ: ა(ა)იპ „საქართველოს საჯარო მოსამსახურეთა პროფესიული კავშირი“, ა(ა)იპ „საქართველოს სახელმწიფო საჯარო სამსახურის, მუნიციპალური დაწესებულებების და საზოგადოებრივი მომსახურების პროფკავშირი“ და ა(ა)იპ „კონსტიტუციის 78-ე მუხლი“. „სარეგისტრაციოდ წარმოდგენილი არასამეწარმეო (არაკომერციული) იურიდიული პირის სახელწოდებამ შესაძლოა შეცდომაში შეიყვანოს მესამე პირები ან/და გამოიწვიოს შეცდომა ან/და გაუგებრობა სუბიექტის ფორმისა თუ საქმიანობის მოცულობის გამო“, - წერია რეესტრის დასაბუთებაში, რომლის საფუძველზეცაა შეჩერებული რეგისტრაცია. ამავე გადაწყვეტილების მიხედვით, პროფკავშირს რეგისტრაციის გასაგრძელებლად ანუ სახელის შესაცვლელად 30-დღიანი ვადა აქვს. 2024 წლის 25 დეკემბერს ცნობილი გახდა, რომ პროევროპული საპროტესტო დემონსტრაციებისა და საჯარო სამსახურის კანონში შეტანილი ცვლილებების პარალელურად, საჯარო მოსამსახურეები დამოუკიდებელ პროფესიულ კავშირს აფუძნებდნენ, რაზეც უარი მიიღეს. „ქართულმა ოცნებამ“ 2024 წლის დეკემბრის დასაწყისში დაჩქარებული წესით განიხილა და დაამტკიცა „საჯარო სამსახურის შესახებ კანონში“ ცვლილებები. სახალხო დამცველის შეფასებით, საჯარო სამსახურში რეორგანიზაციით გათავისუფლებულ პირებს „აღარ ექნებათ საჯარო სამსახურში აღდგენის მოთხოვნის უფლება, რაც მათ სხვა საფუძვლით სამსახურიდან გათავისუფლებულ მოხელეებთან არათანაბარ მდგომარეობაში ჩააყენებს“. ასევე ნახეთ საბოლოოდ, რა შეიცვალა „საჯარო სამსახურის შესახებ“ კანონში? - იურისტის ანალიზი 2024 წლის 28 ნოემბრი...