ევროპის ჟურნალისტთა ფედერაციის (EFJ) ხელმძღვანელი რიკარდო გუტიერეზი პასუხობს საზოგადოებრივი მაუწყებლის იმ თანამშრომლებს, რომლებმაც ევროპის ჟურნალისტთა ფედერაციასა და მედიის თავისუფლებაზე მომუშავე სხვა ორგანიზაციებს წერილით მიმართეს. საზოგადოებრივი მაუწყებლის ჟურნალისტები ფედერაციას ატყობინებდნენ, რომ გახდნენ კოორდინირებული თავდასხმებისა და სარედაქციო პოლიტიკაში ჩარევის მცდელობების სამიზნეები. წერილი, რომელსაც საზოგადოებრივი მაუწყებლის 140-ზე მეტი თანამშრომელი აწერს ხელს, იწყება იმაზე შეშფოთების გამოხატვით, რომ 4 თებერვალს ევროპის ჟურნალისტთა ფედერაციამ მხარი დაუჭირა საზოგადოებრივი მაუწყებლის იმ ჟურნალისტებს, რომლებმაც მაუწყებლის ბორდის სხდომაზე გააკრიტიკეს არხი "ნეტგაზეთისა" და "ბათუმელების" დამფუძნებლის, მზია ამაღლობელის დაკავების სუსტი გაშუქების გამო. ისინი ასე შეეცადნენ არხის ხელმძღვანელობისა და საზოგადოების ყურადღების მიქცევას. "სამაგიეროს გადახდის ნიშნად, 4 თებერვალს ვასილ ივანოვ-ჩიქოვანს არ მიეცა საშუალება, წაეყვანა თავისი საინფორმაციო პროგრამა. ევროპის ჟურნალისტთა ფედერაცია ამ აკრძალვას მიიჩნევს მიუღებლად, ცენზურის გამოყენებად და პოლიტიკურ ჩარევად. ჩვენ მოვუწოდებთ ევროპის მაუწყებელთა კავშირს, რომ ჩაერიოს”, - ნათქვამი იყო 4 თებერვალს ევროპის ჟურნალისტთა ფედერაციის ხელმძღვანელის განცხადებაში. ამ წერილში რიკარდო გუტიერეზი ასევე წერდა: "თუ უსამართლოდ სანქცირებულ ჟურნალისტს დაუყოვნებლივ არ დააბრუნებენ პოსტზე, საქართველოს საზოგადოებრივი მაუწყებელი უნდა გაირიცხოს ევროპის მაუწყებელთა კავშირიდან (EBU)". "ფაქტობრივად არასწორი და მცდარია ის, რომ თქვენ ვასილ ივანოვ-ჩიქოვანის ეთერიდან მოხსნა დააკავშირეთ მის მიერ მზია ამაღლობელისადმი გამოხატულ სოლიდარობასთან... თქვენი ორგანიზაციის მისია, განსაკუთრებით ასეთ მწვავე ვითარებაში, ჟურნალისტების დაცვაა. თუმცა, თქვენს მიერ გამოქვეყნებული განცხადებით, თქვენ კიდევ უფრო მძიმე დარტყმა მიაყენეთ თავისუფალი და დამოუკიდებელი მედიის ჟურნალისტებს", - წერია საზოგადოებრივი მაუწყებლის თანამშრომლების წერილში, რომლის ადრესატებიც ევროპის ჟურნალისტთა ასოციაციის გარდა, არიან ასევე საერთაშორისო პრესის ინსტიტუტი (IPI), პრესისა და მედიის თავისუფლების ევროპული ცენტრი (ECPMF), Free Press Unlimited (FPU), OBC Transeuropa (OBCT), Index on Censorship, ფონდი „სამართლიანობა ჟურნალისტებისთვის“, "რეპორტიორები უსაზღვრებოდ" (RSF) და PEN International. ამ წერილში საზოგადოებრივი მაუწყებლის ჟურნალისტები, ოპერატორები, რედაქტორები და პროდიუსერები საუბრობენ მტრულ გარემოზე, მათ წინააღმდეგ წარმოებულ საინფორმაციო კამპანიებსა და ინტენსიურ, კოორდინირებულ თავდასხმებზე, რომელთა მიზანიც, მათი შეფასებით, სარედა...