ონლაინგამოცემების, „ნეტგაზეთისა“ და „ბათუმელების“ დამფუძნებელსა და დირექტორს, მზია ამაღლობელს, რომელიც პატიმრობაშია, კლინიკა „ვივამედიდან“ პენიტენციურ დაწესებულებაში დღეს, 26 თებერვალს, დააბრუნებენ - ინფორმაციას ავრცელებს მისი უფლებების დამცველი არასამთავრობო ორგანიზაცია „საქართველოს ახალგაზრდა იურისტთა ასოციაცია“. „დაბრუნება მისი სურვილი იყო როგორც შიმშილობის პერიოდში, ისე ახლაც“, - აცხადებენ ორგანიზაციაში და დასძენენ, რომ მზია ამაღლობელს სურს, მონაწილეობა მიიღოს 4 მარტს ბათუმის საქალაქო სასამართლოში დაგეგმილ პროცესში. რადიო თავისუფლება ესაუბრა კლინიკა „ვივამედის“ კლინიკურ დირექტორს, ზურაბ ჩხაიძეს. მისი თქმით, მზია ამაღლობელის კვების აღდგენის პროცესი პროტოკოლის შესაბამისად მიმდინარეობდა: „მზია ამაღლობელის მდგომარეობა არის დამაკმაყოფილებელი. განსაკუთრებული ჩივილი მას არ აქვს. უგრძელდებოდა კვების აღდგენის კურსი, თუმცა მან დღეს მოითხოვა პენიტენციურ დაწესებულებაში დაბრუნება და მკურნალობის არსებული კურსის შეწყვეტა. მას ჩვენ ავუხსენით შესაძლო გართულებების შესახებ, მაგრამ დარჩა თავის პოზიციაზე. ჩვენ გავცემთ შესაბამის რეკომენდაციას, რისი შესრულებაც გაგრძელდება პენიტენციური დაწესებულების ბაზაზე“. რადიო თავისუფლება პასუხს ელოდება იუსტიციის სამინისტროდანაც, რომლის დაქვემდებარებაშიც არის პენიტენციური დაწესებულება. მზია ამაღლობელი ბათუმის პოლიციამ 11 იანვარს, გვიან საღამოს, ჯერ ადმინისტრაციული წესით დააკავა სტიკერის გაკვრის გამო, შემდეგ კი 12 იანვარს ხელახლა დააკავა, ამჯერად სისხლის სამართლის წესით, რაც, იურისტების შეფასებით, საქმის გარემოებებთან შეუთავსებელია და მხოლოდ პოლიტიკურ მოტივზე მიანიშნებს. ჟურნალისტს პოლიციელისთვის სილის გაწვნის გამო ოთხიდან შვიდ წლამდე პატიმრობა ემუქრება. მას სინდისის პატიმრად მიიჩნევენ კოლეგები, უფლებადამცველი ორგანიზაციები, ოპოზიციონერი პოლიტიკოსები, ევროკავშირი, ათობით საერთაშორისო ორგანიზაცია და არაერთი ქვეყნის მთავრობა. მზია ამაღლობელმა დაკავების მომენტიდან შიმშილობა დაიწყო. შიმშილობის 24-ე დღეს, ჯანმრთელობის მდგომარეობის გაუარესების გამო, ის რუსთავის მე-5, ქალთა პენიტენციური დაწესებულებიდან „ვივამედში“ გადაიყვანეს. მზია ამაღლობელმა პროტესტის ნიშნად დაწყებული შიმშილობა 38-ე დღეს, 18 თებერვალს, შეწყვიტა და ექიმების ჩართულობით კვების აღდგენის პროცესი დაიწყო. ასევე ნახეთ 38 დღის შემდეგ მზია ამაღლობელი ამბობს, რომ შიმშილობას შეწყვეტს ...