მსვლელობის მონაწილეები დაიძრნენ გეგეშიძის პარკიდან, ამაღლების ქუჩიდან, ავლაბრის მეტროდან, ვაკის პარკიდან, მარჯანიშვილის მოედნიდან, სადგურის მოედნიდან და სპორტის სასახლიდან. საბოლოოდ, დემონსტრანტები გმირთა მოედანზე გაერთიანდნენ, შემდეგ კი იგეგმება, რომ ასევე მსვლელობით რუსთაველის გამზირზე, პარლამენტის შენობასთან გადაინაცვლონ. მომიტინგეებს ხელში უჭირავთ პლაკატები, რომლებზეც პროვეროპული აქციების დროს დაკავებულთა სახელები წერია. "დუმდა სიონი, არ დუმდა ხალხი" - ეს არის დღევანდელი შეკრების მთავარი ლოზუნგი. აქციის მონაწილეებმა საქართველოს ტერიტორიული მთლიანობისთვის დაღუპულ გმირთა მემორიალთან ფიცი დადეს, რომლის ავტორია მწერალი ლაშა ბუღაძე: "ჩვენი გმირების წინაშე, ვინც ჯავშნად გვედგა, ვინც ანდერძად დაგვიტოვა სახელოვნად გამარჯვება, ვინც არ დანებდა, ვინც 100 წლის წინ იბრძოლა ჩვენი თავისუფლების მტრების წინააღმდეგ, მათი სულების წინაშე, რომლებიც დღეს დაგვცქერიან ჩვენ, წარსულის და დღევანდელი გმირების, - 49 სინდისის პატიმრის სახელით, ისტორიისა და მომავლის წინაშე ვფიცავთ: არ მივატოვებთ სიმათრლისათვის დევნილებს! სიტყვით და საქმით ხელს გავუწვდით მათ და მათ ოჯახებს! ვფიცავთ - ვიქნებით ერთად! ვფიცავთ - ვიბრძოლებთ ბოლომდე!" три მესამე თვეა, საქართველოში საპროტესტო აქციები მიმდინარეობს ევროინტეგრაციის გზაზე ქვეყნის დაბრუნების, ახალი საპარლამენტო არჩევნების და უკანონოდ დაკავებული დემონსტრანტების გათავისუფლების მოთხოვნებით. აქციები მას შემდეგ დაიწყო, რაც 2024 წლის 28 ნოემბერს „ქართული ოცნების" მთავრობამ გამოაცხადა, რომ 2028 წლის ბოლომდე დღის წესრიგში აღარ დააყენებს ევროკავშირში გასაწევრიანებლად მოლაპარაკებების გახსნის საკითხს. ...