დიდი ბრიტანეთის პრემიერ-მინისტრმა კირ სტარმერმა პარლამენტში განაცხადა, რომ 2027 წლამდე ქვეყნის თავდაცვის ხარჯები მშპ-ის 2,5%-ს მიაღწევს. პარლამენტის უფლებამოსილების ბოლოსთვის, 2029 წლისთვის, ეს მაჩვენებელი 3%-მდე გაიზრდება. ხუთშაბათს სტარმერი ამერიკაში ჩავა და შეხვდება აშშ-ის პრეზიდენტ დონალდ ტრამპს, რომელმაც ევროპის ქვეყნები არაერთხელ გააკრიტიკა თავდაცვის სფეროს არასაკმარისი დაფინანსებისთვის. ტრამპის მთავრობა ასევე აცხადებს, რომ ევროპელებმა თავად უნდა იტვირთონ როგორც საკუთარი ქვეყნების, ისე უკრაინის დაცვა. ამჟამად დიდი ბრიტანეთი მშპ-ის 2,3%-ს ხარჯავს თავდაცვაზე. სტარმერის მთავრობა ადრეც დებდა პირობას, რომ ეს მაჩვენებელი 2,5%-ს მიაღწევს. მაგრამ მას აქამდე ვადები არ დაუსახელებია. როგორც BBC შენიშნავს, მთავრობა ამის გაკეთებას აპირებდა თავდაცვითი პოლიტიკის რევიზიის პროცესის შესაბამისად, რომელიც შარშან დაიწყო და წელს გაზაფხულზე უნდა დასრულებულიყო. სახსრების გამოთავისუფლებისთვის მთავრობა აპირებს, რომ განვითარებადი ქვეყნების დახმარება მშპ-ის 0,5%-დან 0,3%-მდე დაიყვანოს. ასევე ნახეთ რას შეიძლება ნიშნავდეს უკრაინაში ევროპული სამშვიდობო ძალების განლაგება და რამდენად რეალისტურია ეს? ოპოზიციური კონსერვატიული პარტიის ლიდერი კემი ბადენოკი მიესალმა სტარმერის განცხადებას და თქვა, რომ კონსერვატორები მხარს უჭერენ თავდაცვის ხარჯების გაზრდას განვითარებადი ქვეყნებისთვის დახმარების შემცირების ხარჯზე. ბადენოკის თქმით, დასავლეთმა საკმარისი არ გააკეთა უკრაინისთვის. ამასთან, ის წინააღმდეგია მთავრობის მიერ გადასახადებისა და ვალების გაზრდისა. სტარმერმა თავის გამოსვლაში თქვა, რომ ეს არ მოხდება. მან ასევე ხაზგასმით აღნიშნა, რომ უკრაინას, სუდანსა და ღაზის სექტორს დახმარება არ შეუწყდებათ. სიდიდით მესამე, ლიბერალურ-დემოკრატიული პარტიის ლიდერმა ედ დეივიმ ასევე დაუჭირა მხარი სტარმერის პოზიციას თავდაცვის ხარჯების გაზრდის საკითხში. ამავე დროს ლიბერალ-დემოკრატები აცხადებენ, რომ არც მშპ-ის 2,5% არ კმარა გეოპოლიტიკური დაძაბულობის ფონზე და რომ საჭიროა მინიმუმ 3%-ის მიღწევა. ასევე ნახეთ ტრამპი ამბობს, რომ პუტინი თანახმაა უკრაინაში ევროპელი ჯარისკაცების განთავსებაზე. კრემლი ამას ეჭვქვეშ აყენებს ...