უკრაინის პარლამენტმა, ვერხოვნა რადამ, პრეზიდენტ ვოლოდიმირ ზელენსკის მეორე კენჭისყრით დაუმტკიცა უფლებამოსილებები სამხედრო მდგომარეობის დასრულებამდე. 268 დეპუტატმა დაუჭირა მხარი დადგენილებას უკრაინაში დემოკრატიის მხარდაჭერის შესახებ. დადგენილების თანახმად, იმისთვის პასუხისმგებლობა, რომ ქვეყანაში შეუძლებელია არჩევნების ჩატარება, რუსეთის პრეზიდენტ ვლადიმირ პუტინს აკისრია. დეპუტატებმა გადაწყვიტეს, რომ უკრაინის პრეზიდენტის არჩევნები გაიმართება მაშინ, როცა უზრუნველყოფილი იქნება „ყოვლისმომცველი, სამართლიანი და მყარი მშვიდობა“. ვერხოვნა რადამ დოკუმენტში ასევე მიუთითა, რომ ზელენსკის მანდატი ეჭვს არ იწვევს, ვინაიდან ის გამჭვირვალე და თავისუფალი კენჭისყრის მეშვეობით იქნა არჩეული. ის თავის უფლებამოსილებებს შეასრულებს მანამდე, სანამ ახალი პრეზიდენტი დაიკავებს თანამდებობას. ვერხოვნა რადამ ადრე გამართულ კენჭისყრაზე ვერ შეძლო ამ დადგენილების მიღება. მაშინ დოკუმენტს მხარი დაუჭირა 218-მა დეპუტატმა, საჭირო იყო მინიმუმ 226. ასევე ნახეთ ზელენსკიმ 9 მაისამდე გაახანგრძლივა საომარი მდგომარეობა და მობილიზაცია უკრაინაში საპრეზიდენტო არჩევნები შარშან გაზაფხულზე უნდა ჩატარებულიყო, მაგრამ ომის გამო გადაიდო. უკრაინის კანონის თანახმად „სამხედრო მდგომარეობის რეჟიმის შესახებ“, სამხედრო მდგომარეობის შემთხვევაში არჩევნები არ ტარდება, მოქმედი ხელისუფლების უფლებამოსილებები გრძელდება სამხედრო მდგომარეობის გაუქმებამდე. არჩევნების გაუქმების შემდეგ რუსეთის პრეზიდენტმა ვლადიმირ პუტინმა ზელენსკის არაერთხელ უწოდა უკანონო პრეზიდენტი, ვინაიდან მისი საპრეზიდენტო ვადა ამოიწურა. პუტინის თქმით, ზელენსკის არა აქვს უფლება, ხელი მოაწეროს რაიმე შეთანხმებას რუსეთთან, მაგრამ ის აღიარებდა ვერხოვნა რადის უფლებამოსილებას. ადრე აშშ-ის პრეზიდენტმა დონალად ტრამპმა ზელენსკის უწოდა „დიქტატორი არჩევნების გარეშე“, რომელსაც ქვეყნის მოსახლეობის მხოლოდ 4% უჭერს მხარს. მან ასევე თქვა, რომ სამშვიდობო მოლაპარაკებებში უკრაინის პრეზიდენტის მონაწილეობა არ არის აუცილებელი. ზელენსკიმ ამაზე განაცხადა, რომ ტრამპი „დეზინფორმაციის სივრცეში“ ცხოვრობს. ასევე ნახეთ ტრამპმა აშშ-რუსეთის ურთიერთობების ტრადიციული ჩარჩოები გაარღვია ...