ამ საკანონმდებლო ცვლილებებით, ამ დრომდე თვითრეგულირების ფარგლებში მოქცეული საკითხების განხილვის უფლება კომუნიკაციების კომისიას ექნება, მას კი ტელევიზიებისა და რადიოების დაჯარიმება შეეძლება. „ქართულ ოცნებაში“ ამბობენ, რომ ეს არის ბრიტანული მედიამოდელი, რომელიც „მედიამომსახურების სფეროში ხარისხიან და ობიექტურ მაუწყებლობას“ უზრუნველყოფს. კომუნიკაციების კომისიას ტელევიზიებისა და რადიოების გაფრთხილება და დაჯარიმება შეეძლება, თუ ისინი: ახალი ამბების გაშუქების დროს არ დაიცავენ „სამართლიანობისა“ და „მიუკერძოებლობის“ პრინციპებს - რა იგულისხმება ამ ტერმინებში, განმარტებული არ არის; ახალ ამბებში საკითხის გაშუქების დროს არ დაიცავენ ბალანსს; წინასწარი გაფრთხილების გარეშე, ეთერში გაშვების მიზნით ჩაწერენ ინტერვიუს ან სატელეფონო საუბარს (გარდა იმ შემთხვევისა, როცა არსებობს ვარაუდი, რომ ღიად ჩაწერა ვერ მოხერხდებოდა); „სამართლიანობის პრინციპით“ თუ არ შეირჩევა პირდაპირ ეთერში შესული ზარები (დაუშვებელია ერთი შეხედულების გამოხატვა); სასწავლო დაწესებულებაში, საავადმყოფოში, სასჯელაღსრულების დაწესებულებაში, პოლიციის განყოფილებაში ან სასწრაფო დახმარების მანქანაში მასალის გადაღების დროს არ ექნებათ წინასწარი თანხმობა როგორც უფლებამოსილი პირის, ისე იმ ადამიანების, რომლებსაც იღებენ; პროგრამაში აქტუალურ საკითხზე მხოლოდ ერთი სტუმარი იქნება მიწვეული და ამას გამოიყენებენ იმ პირზე თავდასხმისთვის, რომელიც პროგრამაში არ მონაწილეობს. ამ დრომდე ტელევიზიებსა და რადიოებს ყველა ამ დარღვევაზე თვითრეგულირების მექანიზმის ფარგლებში რეაგირების ვალდებულება ჰქონდათ, თუმცა ამისთვის ჯარიმის გადახდა არ უწევდათ. სანქცია მათ მხოლოდ იმ შემთხვევაში უწესდებოდათ, თუ ამ განხილვაზე იტყოდნენ უარს. „მაუწყებლობის შესახებ“ კანონით, თუ კომუნიკაციების კომისია დაადგენს, რომ მაუწყებელმა დაარღვია ეთიკური სტანდარტი, ის მას გააფრთხილებს და დარღვევების აღმოსაფხვრელად ვადას მისცემს - თუ არხი ამ მითითებას არ შეასრულებს, დააჯარიმებენ. დაჯარიმება შესაძლებელი იქნება, თუ გაფრთხილების მიღებიდან ერთ წელში კომისია მას კიდევ ერთ დარღვევას დაუდგენს. კომისიას შეეძლება მაუწყებელი დააჯარიმოს წლიური შემოსავლის 0,5%-ით, მაგრამ არანაკლებ 2500 ლარით. ...