საფრანგეთი მზადაა, საჭიროების შემთხვევაში გერმანიის ტერიტორიაზე განათავსოს თავისი რამდენიმე ბირთვული გამანადგურებელი, რათა დაანახოს რუსეთს, რომ არაბირთვული ევროპული ქვეყნები მფარველობის გარეშე არ დარჩებიან მაშინაც კი, თუ ამერიკელი სამხედროები დატოვებენ კონტინენტს. ამის შესახებ ბრიტანული გაზეთი The Telegraph წერს სამშაბათს ფრანგ ოფიციალურ პირებზე დაყრდნობით. ერთ-ერთმა წყარომ თქვა, რომ საფრანგეთის გადაწყვეტილებამ შეიძლება აიძულოს ბრიტანეთი, ევროპის კიდევ ერთი ატომური ძალა, ასევე მისცეს გერმანიას ბირთვული უსაფრთხოების გარანტიები. მანამდე, გერმანიის მომავალმა კანცლერმა ფრიდრიხ მერცმა მოუწოდა ბრიტანეთსა და საფრანგეთს, ბირთვული იარაღისგან თავისუფალ გერმანიაზე გაავრცელონ თავიანთი „ბირთვული ქოლგა“ - როგორც ევროპის სწრაფვის ნაწილი, თავდაცვის საკითხებში აშშ-ისგან უფრო დამოუკიდებელი გახდეს. „რამდენიმე ფრანგული ატომური გამანადგურებლის განლაგება მარტივი ნაბიჯია, რომელიც ძლიერი მესიჯი იქნებოდა“, თქვა ერთ-ერთმა წყარომ. ოფიციალურ პარიზს პუბლიკაციაზე კომენტარი ჯერ არ გაუკეთებია. ასევე ნახეთ „ცუდი მშვიდობა ომზე უარესია“ - ადმირალი დრაგონე უკრაინაზე, ნატოზე, რუსულ საფრთხეზე მეორე მსოფლიო ომის შემდეგ შეერთებულმა შტატებმა დასავლეთ ევროპაში თავისი მოკავშირეების უსაფრთხოება უზრუნველყო, მათ შორის კონტინენტზე განთავსებული ბირთვული იარაღის საშუალებით. სსრკ-სთან შეთანხმებით ევროპაში განლაგებული საშუალო და მოკლე რადიუსის რაკეტების ლიკვიდაციის შემდეგ გერმანიაში აშშ-ის ბაზაზე 100-მდე ბირთვული ქობინი რჩება. გაზეთი აღნიშნავს, რომ საფრანგეთის ბირთვული ძალები ნატოსგან ავტონომიურად მოქმედებენ, ხოლო ბრიტანეთის ბირთვული ძალები მტკიცედ არიან ჩართული ამ ალიანსის სტრუქტურაში. სავარაუდოა, რომ საფრანგეთს აქვს 300-ზე მეტი ბირთვული ქობინი, რომელთა უმეტესობას წყალქვეშა ნავები ატარებენ. ბრიტანეთს აქვს 200-ზე მეტი ქობინი და მისი ბირთვული ძალები შედგება ოთხი ბირთვული წყალქვეშა ნავისგან, რომლებიც ატარებენ „ტრიდენტის“ რაკეტებს. ევროპის ბევრი ლიდერი, მათ შორის მერცი, ვაშინგტონისა და მოსკოვის დაახლოებისა და ტრამპის ადმინისტრაციის მხრიდან ევროკავშირის კრიტიკის გათვალისწინებით, შიშობს, რომ აშშ-ს შეუძლია შეზღუდოს ევროპასთან თავდაცვის სფეროში თანამშრომლობა, მათ შორის, კონტინენტიდან ამერიკული ჯარების გაყვანა და ნატოს დატოვებაც კი. ვაშინგტონს მსგავსი გეგმები ოფიციალურად არ გამოუცხადებია. ასევე ნახეთ აქტივისტები: ყირიმში კვლავ ამოქმედდა წყალქვეშა ნავების საიდუმლო საბჭოთა ბაზა ...