ევროკავშირი, აშშ-ის კვალდაკვალ, უკრაინას სთავაზობს შეთანხმების გაფორმებას თანამშრომლობაზე "კრიტიკულად მნიშვნელოვანი" მინერალების მოპოვების პროცესში. ამის შესახებ ორშაბათს გამოაცხადა ევროკომისარმა სამრეწველო სტრატეგიის საკითხებში, სტეფან სეჟურნემ. მისი თქმით, შესაძლო შეთანხმებასთან ევროკავშირის მიდგომაა, უკრაინას ორმხრივად მომგებიანი პარტნიორობა შესთავაზოს. "ჩვენ არასდროს მოვითხოვთ ისეთ შეთანხმებას, რომელიც ორივე მხარისთვის არ იქნებოდა მომგებიანი", - ამბობს სეჟურნე. მისი თქმით, უკრაინა შეძლებდა ევროკავშირის უზრუნველყოფას 30-დან 21 მინერალით, რომლებსაც კრიტიკულად დიდი მნიშვნელობა აქვს ევროკავშირის მრეწველობისთვის. ევროკავშირის წინადადებაზე უკრაინას განცხადება ჯერ არ გაუვრცელებია. სააგენტო France Presse აღნიშნავს, რომ შეთანხმებაზე საუბარი დაიწყო უკრაინასა და აშშ-ს შორის ბუნებრივი რესურსების ერთობლივი დამუშავების შესახებ მიმდინარე მოლაპარაკების კონტექსტში. ამ მოლაპარაკებებს თან ახლდა მკვეთრი გამონათქვამები უმაღლესი ეშელონებიდან. მედიაში გავრცელებული ცნობებით, აშშ-მა უკრაინას შესთავაზა 500 მილიარდი დოლარის მოცულობის ფონდის შექმნა, რომელშიც შევა მოგება უკრაინაში მოპოვებული იშვიათი წიაღისეული მეტალების და ბუნებრივი რესურსების გაყიდვებიდან - და, ამასთან, ფონდი აშშ-ის კონტროლქვეშ იქნება. უკრაინის პრეზიდენტმა ვოლოდიმირ ზელენსკიმ უარი განაცხადა შეთანხმების ამ ვარიანტზე, რამაც აშშ-ის პრეზიდენტის, დონალდ ტრამპის უკმაყოფილება გამოიწვია. მოლაპარაკებები გაგრძელდა. ორშაბათს ტრამპმა განაცხადა, რომ პროცესი უახლოვდება შეთანხმების გაფორმებას და ეს მოხდება ზელენსკის ვიზიტისას თეთრ სახლში. თუმცა ოფიციალური ცნობა, რომ შეთანხმება მზადაა ხელმოწერისთვის, არ გავრცელებულა. კიევი კვლავ აცხადებს, რომ ამგვარმა შეთანხმებამ უნდა მოიცვას უკრაინის უსაფრთხოების გარანტიები, რუსეთისგან მომდინარე საფრთხესთან მიმართებით. ტრამპის განცხადებებიდან ჩანს, რომ იგი საკუთრივ ამ შეთანხმების არსებობას განიხილავს ასეთ გარანტიად. ტრამპი ასევე მიიჩნევს, რომ შეთანხმება იქნება ერთგვარი კომპენსაცია იმ დახმარებისა, რომელიც აშშ-მა უკრაინას ბოლო წლებში გაუწია, იქ შეჭრილი რუსეთის ძალებისგან თავდაცვაში. კიევი არ ეთანხმება ვაშინგტონის მხრიდან გავრცელებულ მონაცემებს ამ დახმარების მოცულობის თაობაზე. ახლახან რუსეთის პრეზიდენტი ვლადიმირ პუტინიც გამოვიდა განცხადებით, რომ მოსკოვი მზადაა, აშშ-სთან ითანამშრომლოს იშვიათი წიაღისეული მეტალების მოპოვებაში - მათ შორის, როგორც მისი სიტყვებიდან ჩანს, უკრაინის რუსეთის მიერ ოკუპირებულ ტერიტორიებზეც. პუტინის განცხადებას ჯერჯერობით რეაქცია არ მოჰყოლია. ასევე ნახეთ ტრამპი გეგმავს "ფული დაიბრუნოს" უკრაინასთან მინერალების შესახებ პოტენციური შეთა...