„სამი წლის წინ რუსეთმა დაიწყო სრულმასშტაბიანი დამპყრობლური ომი უკრაინის წინააღმდეგ. რუსეთის სასტიკი ომი განზრახ არის მიმართული სამოქალაქო და კრიტიკული ინფრასტრუქტურის წინააღმდეგ. უკრაინელმა ხალხმა სიმამაცე გამოავლინა საკუთარი სახელმწიფოსა და საერთაშორისო სამართლის ძირითადი პრინციპების დაცვისას. პატივს მივაგებთ იმათ ხსოვნას, ვინც დაიღუპა და ახლობლები დაკარგა უკრაინის დამოუკიდებლობისთვის,“ განაცხადეს ევროკავშირის ლიდერებმა, რომლებიც კიევში ჩავიდნენ დღეს, უკრაინის წინააღმდეგ რუსეთის მიერ სრულმასშტაბიანი ომის დაწყების მესამე წლისთავზე. ევროპული საბჭოს პრეზიდენტმა ანტონიუ კოშტამ, ევროკომისიის თავმჯდომარე ურზულა ფონ დერ ლაიენმა და ევროპარლამენტის თავმჯდომარე რობერტა მეცოლამ თავიანთ განცხადებაში პირობა დადეს, რომ მხარს დაუჭერენ კიევს და სამართლიანი მშვიდობის მიღწევაზე იმუშავებენ. ასევე ნახეთ კიევში ჩავიდნენ ევროკომისიის და ევროპული საბჭოს პრეზიდენტები ევროკავშირის ლიდერების თქმით, ევროკავშირში უკრაინის ინტეგრაცია უკვე დაწყებულია: „უკრაინელებმა ევროპის კავშირში ყოფნის სურვილი გამოთქვეს. ჩვენ ეს ვაღიარეთ, მივეცით რა უკრაინას კანდიდატის სტატუსი და დავიწყეთ მიღებაზე მოლაპარაკებები. უკრაინამ ყველაზე რთულ გარემოებებში მიაღწია საგრძნობ წინსვლას რეფორმების სფეროში, რომლებიც დაკავშირებულია გაწევრიანებასთან. ჩვენ უკვე ვახდენთ უკრაინის ინტეგრირებას ევროკავშირის შიდა ბაზარზე. უკრაინისა და მისი მოქალაქეების მომავალი ევროპის კავშირშია,“ ნათქვამია ევროკავშირის ლიდერთა განცხადებაში. ...