დიდი ბრიტანეთის პრემიერ-მინისტრი კირ სტარმერი აშშ-ის პრეზიდენტ დონალდ ტრამპს წარუდგენს გეგმას, რომლის თანახმად, ვაშინგტონის შუამავლობით უკრაინაში ცეცხლის შეწყვეტის შეთანხმების მიღწევის შემთხვევაში, მისი დაცვის უზრუნველსაყოფად ევროპა უკრაინაში გაგზავნის 30 ათასამდე სამხედროს. ამის შესახებ ინფორმირებულ წყაროებზე დაყრდნობით წერს ბრიტანული გამოცემა Telegraph-ი. ვაშინგტონში დიდი ბრიტანეთის პრემიერ-მინისტრ კირ სტარმერის და საფრანგეთის პრეზიდენტ ემანუელ მაკრონის ვიზიტი მომავალ კვირაშია დაგეგმილი. Telegraph-ის წყაროთა თანახმად, სტარმერი მოითხოვს, რომ აღმოსავლეთ ევროპაში განთავსებული ამერიკული გამანადგურებლები და რაკეტები მზადყოფნაში მოიყვანონ, თუ რუსეთი ზავის პირობებს დაარღვევს. ბრიტანული გამოცემის ინფორმაციით, უსაფრთხოების ძალების შექმნის ბრიტანულ-ფრანგული გეგმა წარდგენილი იყო ევროპელი ლიდერების საგანგებო სამიტზე, რომელიც ამ კვირაში პარიზში გაიმართა. სამიტის მოწვევას წინ უძღოდა აშშ-ის პრეზიდენტ დონალდ ტრამპის გადაწყვეტილება, რუსეთთან დაიწყოს მოლაპარაკებები უკრაინაში ომის დასასრულებლად. პარიზის სამიტი ერთი დღით უსწრებდა აშშ-ისა და რუსეთის დელეგაციების შეხვედრას, რომელიც 18 თებერვალს საუდის არაბეთში გაიმართა. ასევე ნახეთ რას შეიძლება ნიშნავდეს უკრაინაში ევროპული სამშვიდობო ძალების განლაგება და რამდენად რეალისტურია ეს? პარიზის სამიტის წინ, 16 თებერვალს, პრემიერ-მინისტრმა კირ სტარმერმა განაცხადა, რომ დიდი ბრიტანეთი მზად არის, საჭიროების შემთხვევაში უკრაინაში თავისი სამხედროები გაგზავნოს სამშვიდობო შეთანხმების შესრულების უზრუნველსაყოფად. უკრაინაში თავისი სამშვიდობო ძალების გაგზავნა არ სურს ევროკავშირის ზოგიერთ ქვეყანას, მათ შორის გერმანიას, იტალიასა და ესპანეთს. ასევე ნახეთ ზელენსკი ტრამპის სამიზნედ - რატომ დაიძაბა უკრაინისა და აშშ-ის ლიდერების ურთიერთობა? მომავალ კვირაში სამი წელი შესრულდება უკრაინაში ომის დაწყებიდან. რუსეთის არმია უკრაინის ტერიტორიაზე 2022 წლის 24 თებერვალს შეიჭრა. პრეზიდენტმა პუტინმა „სპეციალური სამხედრო ოპერაციის" მიზნად გამოაცხადა უკრაინის „დემილიტარიზაცია და დენაციფიკაცია". უკრაინაში რუსული არმიის ფართომასშტაბიან შეჭრას წინ უძღოდა პუტინის მიერ უკრაინის ორი სეპარატისტული რეგიონის, დონეცკის და ლუგანსკის ე.წ. სახალხო რესპუბლიკების, „დამოუკიდებლობის" აღიარება. მანამდე რუსეთმა მოითხოვა, რომ უკრაინა არ გახდეს ნატოს წევრი. 2022 წლის 30 სექტემბერს, რუსეთმა თავის ტერიტორიებად გამოაცხადა უკრაინის ხერსონის, ზაპოროჟიეს, დონეცკისა და ლუგანსკის ოლქები, თუმცა სრულად ვერცერთ მათგანს ვერ აკონტროლებს. 2014 წლიდან რუსეთის მიერ ანექსირებულია უკრაინის ყირიმის ნახევარკუნძული და ქალაქი სევასტოპოლი. უკრაინა აცხადებ...