დანით თავდასხმა სამხრეთ ავსტრიაში, რომლის შედეგადაც ერთი მოზარდი დაიღუპა და კიდევ ხუთი ადამიანი დაშავდა, „ისლამისტური“ იყო, განაცხადა ავსტრიის შინაგან საქმეთა მინისტრმა 16 თებერვალს. დაკავებულია 23 წლის სირიელი თავშესაფრის მაძიებელი. ქალაქ ვილახში 15 თებერვალს მომხდარმა თავდასხმამ შეძრა ავსტრია. შემთხვევა მოხდა მთავრობის შექმნაზე ამ კვირაში მიმდინარე მოლაპარაკებების ჩაშლის შემდეგ, რომლის მთავარი საკითხები მიგრაცია და უსაფრთხოება იყო. ავსტრია აქამდე მხოლოდ ერთხელ იყო ამ მოტივით თავდასხმის მოწმე - 2020 წელს, როცა ისლამური სახელმწიფოს (IS) მომხრემ სროლა ატეხა ვენის ცენტრში, რის შედეგადაც ოთხი ადამიანი დაიღუპა. შინაგან საქმეთა მინისტრმა გერჰარდ კარნერმა განაცხადა, რომ ვილახში თავდასხმაში ეჭვმიტანილის - 23 წლის სირიელი თავშესაფრის მაძიებელი პირის - რადიკალიზება ინტერნეტით მოხდა "დროის მცირე მონაკვეთში". "ეს ისლამისტური თავდასხმაა, რომელიც IS-სთან არის დაკავშირებული", - განუცხადა კარნერმა ჟურნალისტებს ვილახში, კერნტენის პროვინციაში. ეჭვმიტანილის ბინის გაჩხრეკისას, პოლიციამ იპოვა "ისლამისტური რადიკალური იდეოლოგიის აშკარა მტკიცებულება", როგორიცაა ისლამური სახელმწიფოს დროშები კედელზე, განაცხადა რეგიონის პოლიციის უფროსმა მიხაელა კოლვაისმა პრესკონფერენციაზე. მან ასევე თქვა, რომ პოლიციამ ბინაში იარაღი ან "სხვა სახიფათო ნივთები" ვერ იპოვა და აღნიშნა, რომ საქმეზე გამოძიება "მკვლელობისა და მკვლელობის მცდელობის" ბრალდებებით მიმდინარეობს. პოლიციის თქმით, ეჭვმიტანილი ქალაქის ცენტრში დასაკეცი დანით დაესხა თავს გამვლელებს. სირიელი დააკავეს უშუალოდ თავდასხმის შემდეგ. ის შეაჩერა მისმა თანამემამულე სირიელმა, საკვების დამტარებელმა და ასევე თავშესაფრის მაძიებელმა, რომელიც მანქანით დაეჯახა თავდამსხმელს და მსუბუქად დააზიანა ის. 14 წლის ავსტრიელი დაიღუპა, ხუთი ადამიანი დაშავდა, სამი მათგანი რეანიმაციაში გადაიყვანეს, თუმცა მათი მდგომარეობა სტაბილურია. დაშავებულთა შორის კიდევ ორი მოზარდია, ორივე 15 წლის, დაშავებულთაგან ყველაზე უფროსი 36 წლისაა. ავსტრიაში სირიელ ლტოლვილთა დიდი რაოდენობაა - თითქმის 100 000 ადამიანი. დეკემბერში, სირიაში ბაშარ ალ-ასადის ჩამოგდების შემდეგ, ავსტრიამ და ევროპის რამდენიმე ქვეყანამ შეაჩერეს სირიელებისთვის თავშესაფრის მინიჭების მოთხოვნების განხილვა, მოცემული ვითარების გადახედვის მიზნით. ამასთანავე, ავსტრიამ შეწყვიტა ოჯახების გაერთიანების პროცესი და, სულ ცოტა, 2400 წერილი დააგზავნა ლტოლვილის სტატუსის გაუქმების მოთხოვნით. შინაგან საქმეთა სამინისტრომ განაცხადა, რომ ამზადებს "სირიაში რეპატრიაციისა და დეპორტაციის გეგმაზომიერ პროგრამას". ...