ღვინიანიძე მინისტრის მოადგილის პოსტს 2022 წლიდან იკავებდა, მანამდე იყო ამავე სამინისტროს დაქვემდებარებაში არსებული აღსრულების ეროვნული ბიუროს თავმჯდომარე. მოგვიანებით მან უარყო რაიმე ტიპის უთანხმოება ანრი ოხანაშვილთან და თქვა, რომ რჩება „ქართული ოცნების“ გუნდის წევრად. „გადაწყვეტილება მივიღე პირადი მიზეზებიდან გამომდინარე და ნებისმიერი საუბარი სხვა მოტივაციაზე სრულიად უადგილოა და ემსახურება ცილისმწამებლურ მიზანს... მინდა, მადლობა გადავუხადო იუსტიციის სამინისტროს და ქართული ოცნების ხელისუფლების გუნდს წარმატებული თანამშრომლობისთვის რომლის შედეგადაც მრავალი სასიკეთო საქმის განხორციელება გახდა შესაძლებელი“. ანრი ოხანაშვილს კიდევ ოთხი მოადგილე ჰყავს: ლევან ხარანაული, ირაკლი (დაჩი) ბერაია, ბექა ძამაშვილი და ნიკო თათულაშვილი. „ქართული ოცნების“ პარლამენტმა ირაკლი კობახიძის მთავრობის შემადგენლობას, რომელშიც ანრი ოხანაშვილი იუსტიციის მინისტრის თანამდებობას იკავებს, ნდობა 2024 წლის 28 ნოემბერს გამოუცხადა. არც პარლამენტისა და არც მთავრობის ლეგიტიმაციას არ ცნობენ ოპოზიციური პარტიები, საქართველოს მეხუთე პრეზიდენტი და არასამთავრობო ორგანიზაციები. კითხვები აქვთ საერთაშორისო პარტნიორებსაც. ახალი საპარლამენტო არჩევნების ჩატარების და აქციებზე დაკავებულთა გათავისუფლების მოთხოვნით ყოველდღიურად იმართება პროევროპული მრავალრიცხოვანი აქციები. ერეკლე ღვინიანიძემ ანრი ოხანაშვილის მოადგილედ 2,5 თვე იმუშავა. ამ პერიოდში მისი საკურატორო უწყებიდან - იუსტიციის სახლიდან - გაათავისუფლეს იმ თანამშრომლების ნაწილი, რომლებიც გამოხატავდნენ პოზიციას ქვეყნის ევროინტეგრაციასთან დაკავშირებით, კერძოდ, მიიჩნევდნენ, რომ ევროინტეგრაციის პროცესს აფერხებდა "ქართული ოცნების“ 28 ნოემბერს გამოცხადებული გადაწყვეტილება, რომლითაც უარი თქვეს, ევროკავშირში გაწევრიანებისთვის მოლაპარაკების გახსნის ინიციატორები ყოფილიყვნენ. ...