"ქართული ოცნება" ცდილობს ქვეყანაში ადამიანის უფლებების კრიზისი გამოიწვიოს", - უთხრა ამერიკის ხმას რეიჩელ დენბერმა, Human Rights Watch-ის ევროპისა და ცენტრალური აზიის პროგრამის დირექტორის მოადგილემ. მისი თქმით, ორგანიზაცია 2024 წლის გაზაფხულიდან აღრიცხავს სპეცრაზმის მიერ დემონსტრანტებზე ძალადობის ფაქტებს, მათ შორის მაშინ, როცა ისინი აქციაზე არ მდგარან. "ამ თავდასხმების ხასიათიდან გამომდინარე ნათელი იყო, რომ თავდასხმები კოორდინირებული იყო და ასევე ადვილი მისახვედრი იყო, რომ ისინი საკუთარი ნებით არ მოქმედებდნენ და დავალებას სხვებისგან იღებდნენ", - ამბობს ამერიკის ხმისთვის მიცემულ ინტერვიუში რეიჩელ დენბერი და დასძენს, რომ ამ ტიპის ძალადობას არაფერი ამართლებს. რეიჩელ დენბერი ფიქრობს, რომ "ქართული ოცნების" ქმედებათა ერთობლიობას საქართველო ავტოკრატიისაკენ მიჰყავს. "სახეზე გვაქვს დემონიზების მცდელობა, ძალაში ახლადშესული კანონები და ფიზიკური ძალადობა - ეს ყველაფერი ავტოკრატიის მშენებლობის საყრდენია. ესაა ნაბიჯები ადამიანის უფლებების კრიზისის გამწვავებისკენ, რომელსაც "ქართული ოცნება" დგამს", - თქვა Human Rights Watch-ის წარმომადგენელმა. "ძნელი წარმოსადგენია, რომ ყველა სხვა კანონი და რეგულაცია, რომელიც აქამდე [საქართველოს მთავრობაში] მიიღეს, სპონტანური იყო. როგორც ვთქვით, შედარებები არ მიყვარს, მაგრამ სხვა ავტოკრატიებში ასე ხდება, რაღაც იწყებს და შემდეგ იწვევს სხვა მსგავს მოვლენებს". ...