საქალაქო სასამართლოს მოსამართლე ზვიად ცეკვავამ პოლიტიკოსი, ევროინტეგრაციის საკითხებში ყოფილი სახელმწიფო მინისტრი ალექსი პეტრიაშვილი 5 000 ლარით დააჯარიმა, 2025 წლის 17 იანვარს რუსთაველის გამზირის გადაკეტვის საბაბით. პროცესზე დაიკითხა სამართალდამრღვევის ოქმის შემდგენი პოლიციელი შალვა კოპაძე, რომელმაც თქვა, რომ მოქალაქეები თვითნებურად გადავიდნენ გზის სავალ ნაწილზე იმ დროს, როცა ამის საჭიროება არ არსებობდა. ალექსი პეტრიაშვილის ადვოკატი სანდრო ბარამიძე დაინტერესდა, იცნობს თუ არა მოწმე პოლიციელი შეკრება-მანიფესტაციის შესახებ კანონს. მას კითხვა მოსამართლე ზვიად ცეკვავამ გააწყვეტინა და თქვა: “სასამართლო იკვლევს ფაქტებს და არა მოწმის კომპეტენტურობას”. სანდრო ბარამიძე: "ანუ იმ ადამიანის კომპეტენტურობას, რომელიც ოქმს ადგენს, არ იკვლევთ?" ზვიად ცეკვავა: "ჩვენ ვიკვლევთ რამდენად სწორად შეაფასა ფაქტები და არა კომპეტენტურობას." ამის შემდეგ ადვოკატმა მოსამართლის აცილება მოითხოვა, რადგან მიიჩნია, რომ ის მიკერძოებულია. “თქვენ არ მაძლევთ უფლებას, გამოვიკვლიო პოლიციელი, რომელიც ადგენს სამართალდარღვევათა ოქმს, საერთოდ ერკვევა თუ არა შეკრებისა და გამოხატვის კანონის მუხლებში”, - თქვა ბარამიძემ. მოსამართლემ აცილება არ დააკმაყოფილა და თქვა, რომ მოთხოვნა უსაფუძვლოა, ამასთან, დაამატა, რომ “სხდომაზე იკვლევენ კადრებს და არა იმას, როგორი მოსწრება ჰქონდა მოწმეს უნივერსიტეტში, მაგალითად”. პეტრიაშვილის სამართალდარღვევის დასადასტურებლად შსს-მ მოსამართლეს სამი ნახევარსაათიანი ვიდეო წარუდგინა. “20 საათის შემდეგ იწყება ხოლმე თვითნებური ფაზა, როცა აქციის მონაწილეები ხელოვნურად გადადიან საავტომობილო გზაზე. მათ შორის იყო ალექსი პეტრიაშვილი”, - თქვა შსს-ს იურისტმა. პეტრიაშვილმა აღნიშნა, რომ რუსთაველზე 20:00-ზე მივიდა, მას შემდეგ, რაც გზა გადაიკეტა, ტრანსპორტის სავალ ნაწილზე თავადაც გადავიდა. “მე არ ვარ ინიციატორი. სავარაუდო კანონდარღვევით ქმედებისას და ყოველთვის ვადევნებ თვალს, როგორია პოლიციის რეაგირება იმ შემთხვევაშიც კი, როცა გვაგინებენ და გვლანძღავენ. ამ შემთხვევაში ცხადი იყო, რომ პოლიცია არეგულირებდა სიტუაციას. იქ არავის უთქვამს, რომ გზა არ გადაგვეკეტა და რეაგირება არ მოუხდენია. პოლიცია თანამონაწილეობდა გზის მშვიდობიან გადაკეტვაში”, - თქვა ალექსი პეტრიაშვილმა. შსს-ს წარმომადგენლები ამტკიცებენ, რომ პოლიციას აქციის მონაწილეების გაფრთხილების ვალდებულება არ ჰქონია. “მნიშვნელობა არ აქვს, ვინ იქნება ინიციატორი და ვინ გადადგამს პირველ ნაბიჯს. ბატონი ალექსი გადაჰყვა იმ პირებს, ვინც დაიწყო გზის გადაკეტვა. პოლიციას არ მოუწოდებია. მოწოდების შემთხვევაში პოლიციის მოთხოვნისადმი დაუმორჩილებლობა იქნებოდა ახლა სადავო. აბსურდია, რომ პოლიცია ბლოკირებას ხელს უწყობდა, სამართალდამცველები ვალდ...