სადავო პარლამენტის საპროცედურო საკითხთა და წესების კომიტეტმა, რომლის წევრები მხოლოდ „ქართული ოცნების“ და მისი მოკავშირე „ხალხის ძალის“ წარმომადგენლები არიან, მხარი დაუჭირა 49 ოპოზიციონერი დეპუტატისთვის უფლებამოსილების ვადამდე შეწყვეტას. 19 „კოალიცია ცვლილებისთვის“ წარმომადგენელია, 16 - „ერთიანობა - ნაციონალური მოძრაობის“ და 14 - „ძლიერი საქართველოს“. მათ უფლებამოსილების შეწყვეტა თავად მოითხოვეს. ეს ოპოზიციური გაერთიანებები გაყალბებულად მიიჩნევენ 2024 წლის 26 ოქტომბრის საპარლამენტო არჩევნებს, რომლის ოფიციალური შედეგებით უმრავლესობა „ქართულმა ოცნებამ“ შეინარჩუნა(89 მანდატი). ოპოზიციამ მე-11 მოწვევის პარლამენტი არალეგიტიმურად გამოაცხადა, საკანონმდებლო ორგანოში მუშაობაზე უარი თქვა და ახალ არჩევნებს მოითხოვს. სამი ოპოზიციური გაერთიანების წარმომადგენლებმა 2024 წლის ნოემბერსა და დეკემბერში დაწერეს განცხადებები პარლამენტის წევრის უფლებამოსილების ვადამდე შეწყვეტის შესახებ. ასევე ნახეთ „ოცნების“ საერთაშორისო ლეგიტიმაცია - ვინ აღიარებს საქართველოს ხელისუფლებას? სადავო პარლამენტის საპროცედურო საკითხთა და წესების კომიტეტში შვიდი დეპუტატის მონაწილეობით დღეს, 5 თებერვალს დილით გამართულ სხდომაზე ერთხმად მხარდაჭერილ დასკვნებს 49 დეპუტატისთვის უფლებამოსილების ვადამდე შეწყვეტის შესახებ, კენჭი პარლამენტის პლენარულ სხდომაზე ეყრება. როგორც კომიტეტის თავმჯდომარემ, დავით მათიკაშვილმა განაცხადა, „ჯერი აწი უკვე არის საქართველოს პარლამენტის სესიაზე. პოლიტიკურ გადაწყვეტილებას მიიღებს საქართველოს პარლამენტი". 2024 წლის 26 ოქტომბერს არჩეულ პარლამენტს არალეგიტიმურად მიიჩნევს და ახალ არჩევნებს მოითხოვს კიდევ ერთი ოპოზიციური პარტია, „გახარია საქართველოსთვის“, რომელმაც არჩევნების ოფიციალური შედეგებით, 150-წევრიან პარლამენტში 12 მანდატი მოიპოვა. პარტიის წარმომადგენლები საპარლამენტო საქმიანობაში არ მონაწილეობენ, თუმცა უფლებამოსილების ვადამდე შესაწყვეტად განცხადებები არ დაუწერიათ. საქართველოში 2024 წლის ნოემბრიდან მიმდინარეობს საპროტესტო აქციები ახალი საპარლამენტო არჩევნების მოთხოვნით. ასევე ნახეთ ამომრჩევლების დაშინება, მოსყიდვა, ხმის მიცემის ფარულობა - რა რეკომენდაციები აქვს OSCE/ODHIR-ს ...