USAID-ი - შეერთებული შტატების სააგენტო საერთაშორისო განვითარებისთვის - სახელმწიფო დეპარტამენტს შეუერთდება, თანამშრომელთა მნიშვნელოვანი შემცირების ფონზე, თუმცა დარჩება ჰუმანიტარული დახმარების გამცემ უწყებად. ეს ინფორმაცია CBS News-ს აშშ-ის სამმა ოფიციალურმა პირმა მიაწოდა. აშშ-ის პრეზიდენტის, დონალდ ტრამპის ადმინისტრაციის ოფიციალური პირები ამ ნაბიჯის შესახებ, სავარაუდოდ, უახლოეს დღეებში გამოაცხადებენ. 3 თებერვლისთვის კვლავაც ბუნდოვანი რჩება დაფინანსების შემცირებაზე დისკუსიების შედეგი. CBS News-ს წყაროებმა უთხრეს, რომ აშშ-ის პრეზიდენტმა დონალდ ტრამპმა სახელმწიფო მდივანი მარკო რუბიო დანიშნა USAID-ის ადმინისტრირების ხელმძღვანელის მოვალეობის შემსრულებლად. ეს ცნობა შემდეგ თავად რუბიომ დაუდასტურა ჟურნალისტებს, რომლებიც მას თან ახლდნენ სალვადორში ვიზიტისას. რუბიოს თქმით, სააგენტოს ყოველდღიური მართვის უფლებამოსილება მან სხვა პირს გადააბარა - თუმცა ამ პირის ვინაობა არ დაუსახელებია. ასევე ნახეთ ტრამპი, “მილიარდების დასაზოგად”, საგარეო დახმარების სააგენტოს დაშლას აპირებს USAID-ი, აშშ-შ 1961 წელს შექმნილი საგარეო დახმარების დამოუკიდებელი სააგენტო, 120-მდე სახელმწიფოში მონაწილეობს ჰუმანიტარულ, განვითარებასა და უსაფრთხოებაზე ორიენტირებულ პროგრამებში. კონგრესში მოქმედი ორპარტიული კვლევის სამსახურის თანახმად, სააგენტო "დახმარებას უწევს სტრატეგიულად მნიშვნელოვან ქვეყნებს და კონფლიქტით მოცულ ქვეყნებს; ხელმძღვანელობს აშშ-ის ძალისხმევას სიღარიბესთან, დაავადებებთან ბრძოლაში და ჰუმანიტარული დახმარების სფეროში; და ეხმარება აშშ-ის კომერციულ ინტერესებს, განვითარების პროცესში მყოფი ქვეყნების ეკონომიკური ზრდის მხარდაჭერით". საგარეო დახმარება - რომლის მხოლოდ ერთი ნაწილია USAID-ი - საერთო ჯამში შეადგენს ფედერალური ბიუჯეტის ერთ პროცენტზე ნაკლებს. რუბიომ ჟურნალისტებს უთხრა, რომ გადასახადებით მოპოვებული თანხები აშშ-ის ინტერესების გამყარებას უნდა მოხმარდეს და დასძინა, რომ "USAID-ის ისტორია მოიცავს ამის უგულებელყოფას და საკუთარი თავის ერთგვარ გლობალურ საქველმოქმედო ორგანიზაციად მიჩნევას". თუმცა USAID-ის სახელმწიფო დეპარტამენტთან შეერთება - ხარჯების დაზოგვის მიზნით - სავარაუდოდ, სამართლებრივ კითხვებს წარმოშობს. USAID-ი 1961 წელს დაარსდა კონგრესის გადაწყვეტილებით და მისი დახურვისთვის პრეზიდენტს ასევე კონგრესის თანხმობა დასჭირდება. ტრამპმა 2 იანვარს განაცხადა, რომ სააგენტოს "მართავს რადიკალი შეშლილების ჯგუფი. და ჩვენ მათ იქიდან გამოვიხმობთ". ტრამპის მილიარდერი მრჩეველი ილონ მასკი ამბობს, რომ USAID-ის შესახებ პრეზიდენტთან დეტალური საუბარი ჰქონდა. "ის დათანხმდა, რომ ჩვენ [სააგენტო] უნდა დავხუროთ", - თქვა მასკმა თავის პლატფორმა X-ზე. CBS ...