ადგილობრივი დროით დაახლოებით 04:00 საათისთვის ვოლგოგრადის არაერთმა მცხოვრებმა სოციალური ქსელებით გაავრცელა ინფორმაცია, რომ ძლიერი აფეთქებები მოხდა ქალაქის იმ რაიონში, სადაც ნავთობგადამამუშავებელი ქარხანა, ნავთობის საცავი და თბოელექტროსადგური მდებარეობს. განახლება: დილის ცხრის ნახევრისთვის ვოლგოგრადის საოლქო ადმინისტრაციის ტელეგრამ-არხზე გამოქვეყნდა ცნობა, რომ საჰაერო თავდაცვის სისტემის მიერ მოგერიებული დრონის ნამსხვრევებმა ვოლგოგრადის ნავთობგადამამუშავებელი ქარხნის ტერიტორიაზე გამოიწვია ხანძარი, რომელიც „ოპერატიულად ლიკვიდირებულია". ადმინისტრაციის თანახმად, დაშავდა ქარხნის ერთი თანამშრომელი, რომელიც საავადმყოფოში გადაიყვანეს. ვოლგოგრადის ნავთობგადამამუშავებელ ქარხანაში, რომელიც კომპანია „ლუკოილს“ ეკუთვნის, ხანძარი იყო 15 იანვარსაც. უკრაინის თავდაცვის ძალებმა „ლუკოილის“ ქარხანას 29 იანვარს დრონებით შეუტიეს ნიჟნი-ნოვგოროდის ოლქის ქალაქ კსტოვოშიც. ასევე ნახეთ რუსეთში ადასტურებენ დრონებით დარტყმას სულ მცირე ერთ ქარხანაზე 31 იანვარს, შუაღამის შემდეგ დრონებით შეტევის შესახებ იუწყებოდნენ რუსეთის ვორონეჟის, როსტოვისა და იაროსლავის ოლქების გუბერნატორები. ვორონეჟის გუბერნატორ ალექსანდრ გუსევის ტელეგრამ-არხზე გამოქვეყნებული ცნობით, დაშავდა ერთი ადამიანი და დაზიანებულია ერთ-ერთი საწარმოს შენობა. კონკრეტულ საწარმოს გუსევი არ ასახელებს. როსტოვის ოლქზე დრონებით მასირებული შეტევისა და ერთ-ერთ რაიონში ელექტროგადამცემი ხაზების დაზიანების შესახებ იუწყებოდა რეგიონის გუბერნატორი იური სლუსარი. დილის 8 საათისთვის რუსეთის თავდაცვის სამინისტრომ გამოაქვეყნა მონაცემები, რომელთა თანახმად, ღამის განმავლობაში „გზად დაიჭირეს და გაანადგურეს“ 49 უკრაინული უპილოტო საფრენი აპარატი, მათგან 25 როსტოვის ოლქში, 8 - ვოლგოგრადში, 6 - კურსკის ოლქში, 4 - იაროსლავის ოლქში და 2-2 - ბელგოროდის და ვორონეჟის ოლქებსა და კრასნოდარის მხარეში. ეს ცნობები დამოუკიდებელი წყაროებით დადასტურებული არ არის. ასევე ნახეთ დრონების რბოლა. უპილოტო თვითმფრინავების როლი რუსეთ-უკრაინის ომში რუსეთთან ომში მყოფ უკრაინას რუსეთის ტერიტორიაზე და ანექსირებულ ყირიმში კანონიერ სამიზნედ აქვს გამოცხადებული სამხედრო ობიექტები და საწარმოები, რომლებიც რუსული არმიის მომარაგებაზე მუშაობენ, მათ შორის ნავთობგადამამუშავებელი ქარხნები. BBC-ს რუსული სამსახურის ინფორმაციით, 2024 წელს უკრაინამ რუსეთის ტერიტორიაზე და ყირიმში დრონებით, სულ მცირე, 81-ჯერ შეუტია ნავთობგადამამუშავებელ საწარმოებსა და საწვავის საცავებს. ...