„წინააღმდეგი არ ვიქნები, თუ ბრიტანეთის მთავრობა ბიძინა ივანიშვილს სანქციებს დაუწესებს“, - განაცხადა სერ ედვარდ ლიმ, რომელიც ევროსაბჭოს საპარლამენტო ასამბლეის წევრია. „თუ გაერთიანებული სამეფოს ხელისუფლება ჩათვლის, რომ მისი დანაშაულები იმდენად მძიმეა, რომ სანქციებია საჭირო, ეს წინადადება პარლამენტში უპრობლემოდ გავა“, - უთხრა მან სტრასბურგში, PACE-ში, რადიო თავისუფლების კორესპონდენტს, ვაჟა თავბერიძეს. გაერთიანებული სამეფოს თემთა პალატაში შეტანილია წინადადება, რომლითაც ქვეყნის აღმასრულებელ ხელისუფლებას მოუწოდებენ, დაუწესონ სანქციები ბიძინა ივანიშვილს. წინადადებას, რომელიც 13 იანვარს წარადგინა თემთა პალატაში პარლამენტის წევრმა, ლიბერალ-დემოკრატმა ჯეიმს მაკკლიარიმ, 30 იანვრისთვის 25 ხელმომწერი/მხარდამჭერი ჰყავს. ასევე ნახეთ თემთა პალატაში შეიტანეს ივანიშვილის სანქცირების წინადადება „ეს ბრიტანეთს ბერკეტს აძლევს“ „ძნელად წარმომიდგენია, ვინმე ამის წინააღმდეგ წავიდეს, თუკი მთავრობა ამის გაკეთებას გადაწყვეტს. მით უმეტეს, რომ ივანიშვილის ქონების უზარმაზარი ნაწილი სწორედ ბრიტანეთშია – ეს კი ლონდონს საკმაოდ სერიოზულ ბერკეტს აძლევს“, - ამბობს პარლამენტარი. „მაგრამ საკითხი ასე მარტივად არ დგას“, - დასძენს ის და განმარტავს, რომ „ამას რიგითი პარლამენტარისა თუ უკანა მერხზე მჯდომი დეპუტატის მოწოდება არ ეყოფა“. „ბრიტანეთის პარლამენტი დღეს მუშაობს პრინციპით, „ყველაფერი რჩება გამარჯვებულს“. მთავრობას უზარმაზარი უმრავლესობა აქვს, - ასეულობით ლეიბორისტი დეპუტატი, რომლებიც აკეთებენ იმას, რასაც ეტყვიან. ასე რომ, თუ ქართულ ოპოზიციას სურს, რომ [ივანიშვილზე] სანქციები რეალურად დადგეს დღის წესრიგში, მათ ბრიტანეთის მთავრობა უნდა დაარწმუნონ და არა პარლამენტი“, - განაცხადა სერ ედვარდ ლიმ. 650-წევრიან თემთა პალატაში უმრავლესობას ლეიბორისტული პარტია ფლობს. მას 402 წევრი ჰყავს. კონსერვატორები 121 წევრით არიან წარმოდგენილი. მესამე ადგილზე არიან „ლიბერალ-დემოკრატები“ - 72 პარლამენტარით. სწორედ ამ პარტიის წევრია წინადადების თავდაპირველი ინიციატორი, ჯეიმს მაკკლიარი. „თუ მთავრობა ამ ნაბიჯს გადადგამს, შემიძლია დაგარწმუნოთ – ეს საკითხი ელვის სისწრაფით გაივლის და არანაირი წინააღმდეგობა მას არ ექნება“, – აცხადებს სერ ედვარდ ლი, კონსერვატიული პარტიის წევრი გეინზბოროდან. სერ ედვარდ ლი „ბრიტანეთი მხარს უჭერს სანქციებს“ - ლეიბორისტი ლორდი ტუიგი 29 იანვარს ლორდთა პალატის წევრმა, ლორდმა დონ ტუიგმა, ლეიბორისტული პარტიის წევრმა, რომელიც ამავე დროს ევროსაბჭოს საპარლამენტო ასამბლეაში ბრიტანეთის დელეგაციის თავმჯდომარეა, რადიო თავისუფლებასთან საუბარში ბიძინა ივანიშვილის სანქცირებაზე ისაუბრა. „ბრიტანეთი მტკიცედ უჭერს მხარს სანქციებს მათ წინააღმდეგ, ვინც არღვევს ადამიანის უფლებებს, ვი...