რეზოლუციის პროექტში, რომელიც ანგარიშის შედეგად უნდა მიიღონ, ნათქვამია, რომ 26 ოქტომბრის საპარლამენტო არჩევნების შემდეგ განვითარებული მოვლენები, მათ შორის, შეკრებისა და გამოხატვის თავისუფლების დარღვევა და ოპოზიციისა და სამოქალაქო საზოგადოების დარბევა, ეწინააღმდეგება ევროსაბჭოში საქართველოს წევრობის ვალდებულებებს. "ამიტომ კომიტეტს სურს მკაფიო გარანტიები ხელისუფლებისგან, რომ ისინი ნამდვილად მზად არიან, შეცვალონ დემოკრატიული უკუსვლა და შეასრულონ წევრობის ვალდებულებები", - წერია ევროსაბჭოს წევრი სახელმწიფოების მიერ ვალდებულებებისა და მოვალეობების შესრულების მონიტორინგის კომიტეტის ტექსტში. "დიალოგის შენარჩუნებისადმი ღიაობის ნიშნად", ასამბლეა 2025 წლის აპრილის სესიაზე საქართველოს დელეგაციის უფლებამოსილების საკითხს ხელახლა განიხილავს. ამასთან, დოკუმენტში წერია, რომ ასამბლეა მოითხოვს, საქართველოს ხელისუფლებამ დაუყოვნებლივ შეასრულოს რიგი პირობები, მათ შორის, დაიწყოს ინკლუზიური პროცესი, დაუყოვნებლივ აღმოფხვრას ბოლო საპარლამენტო არჩევნების დროს გამოვლენილი ხარვეზები და შექმნას ისეთი საარჩევნო გარემო, რომელიც ხელს შეუწყობს მომავალ თვეებში გამოცხადებული, ჭეშმარიტად დემოკრატიული ახალი არჩევნების ჩატარებას. "ასევე, დაუყოვნებლივ შეწყდეს პოლიციის მხრიდან სისასტიკე და ადამიანის უფლებების დარღვევის შემთხვევები. ეფექტურად უნდა გამოიძიონ ეს შემთხვევები და დასრულდეს სასამართლო პროცესის ბოროტად გამოყენება, როგორც მომიტინგეების, ჟურნალისტებისა და სამოქალაქო ლიდერების მიმართ შურისძიების საშუალება. სრულად სცენ პატივი გამოხატვისა და შეკრების თავისუფლებას და ყველა პოლიტპატიმარი გათავისუფლდეს 2025 წლის აპრილის სესიამდე", - წერია დოკუმენტში. ამას გარდა, ანგარიშის მხარდაჭერის შემთხვევაში, "ქართული ოცნების" დელეგაციას შეუჩერდება რიგი უფლებები, მათ შორის კომიტეტებში: "პოლიციის სისასტიკისა და ადამიანის უფლებათა სხვა დარღვევების დაგმობის აშკარა ნიშნად, რაზეც ხელისუფლებას აქამდე არ ჰქონია რეაგირება, ასამბლეა გადაწყვეტს, შეაჩეროს ქართული დელეგაციის წევრების შემდეგი უფლებები: უფლება, იყოთ შემდეგი კომიტეტების სრულუფლებიანი წევრები ან შემცვლელი: პოლიტიკური და დემოკრატიის კომიტეტი, მონიტორინგის კომიტეტი, იურიდიულ საკითხთა და ადამიანის უფლებათა კომიტეტი, ადამიანის უფლებათა ევროპულ სასამართლოში მოსამართლეთა არჩევის კომიტეტი და რეგლამენტის, იმუნიტეტებისა და ინსტიტუციურ საკითხთა კომიტეტი; არჩევნების სადამკვირვებლო კომისიის წევრის უფლება; მომხსენებლად დანიშვნის უფლება; უფლება, იყოს ასამბლეის პრეზიდენტობის, კომიტეტის ან ქვეკომიტეტის თავმჯდომარეობის ან ვიცე-თავმჯდომარეობის კანდიდატი; უფლება, წარმოადგინოს ასამბლეა ევროპის საბჭოს ორგანოებში ბიუროს გადაწყვეტილე...