ნატომ დაადასტურა, რომ რუსეთი გეგმავდა გერმანულ კონცერნ Rheinmetall-ის ხელმძღვანელის, არმინ პაპერგერის მოკვლას. ამის შესახებ Politico წერს. ნატოს მაღალჩინოსნის, ჯეიმს აპატურაის თქმით, რუსეთი მთელს ევროპაში გეგმავდა თავდაცვის ინდუსტრიის ლიდერების მკვლელობას პაპერგერის ჩათვლით. მან დასძინა, რომ რუსები დანაშაულებრივი ქმედებების ჩასადენად ხალხს აგროვებენ ონლაინ რეჟიმში, იყენებენ „კრიმინალურ ჯგუფებს, ახალგაზრდებსა და მიგრანტებს, რომლებსაც არავითარი ეჭვი არა აქვთ“. „ბოლო ორი წლის განმავლობაში ნატოს ქვეყნებში მოწმენი ვიყავით დივერსიული ინციდენტებისა, რაშიც ვგულისხმობ მატარებლების ავარიებს, ცეცხლის წაკიდებას, თავდასხმებს პოლიტიკოსთა საკუთრებაზე, შეთქმულებებს ინდუსტრიის ლიდერების მკვლელობის მიზნით, ისეთებისა, როგორიცაა Rheinmetall-ის ხელმძღვანელი“, - თქვა აპატურაიმ. ეს პირველი შემთხვევაა, როდესაც ნატოს, გერმანიის ან აშშ-ის მაღალჩინოსანმა ოფიციალურად დაადასტურა შეთქმულების არსებობა პაპერგერის მკვლელობის მიზნით. ამ შეთქმულების შესახებ ფართოდ იტყობინებოდნენ მსოფლიო მედიაში 2024 წლის ივლისში. მაშინ ცნობილი გახდა, რომ აშშ-ისა და გერმანიის სადაზვერვო სამსახურებმა აღკვეთეს რუსეთის ხელისუფლების დაკვეთით პაპერგერზე თავდასხმა. Rheinmetall-ი არის გერმანიის უმსხვილესი მწარმოებელი იარაღისა, რომელიც სხვა ქვეყნებს შორის უკრაინასაც მიეწოდება. ლაპარაკია საბრძოლო მასალასა და სამხედრო ტექნიკაზე. ასევე ნახეთ რუსეთის „ჰიბრიდული“ ფრონტის გერმანული ხაზი ...