პროკურორი ამტკიცებდა, რომ აღკვეთის ღონისძიების (პატიმრობის) შესაცვლელად ახალი გარემოება არ არსებობდა. საბა სხვიტარიძის ადვოკატმა კი აღნიშნა, რომ საქმეს უკვე თან ერთვის ათობით მოწმის ჩვენება, რომლებიც მათ წარადგინეს. „იქ მყოფებს მოწმეები ახასიათებენ როგორც „ტიტუშკებს“, რომლებიც აყენებდნენ შეურაცხყოფას. თქვენ გინახავთ პოლიციელი, რომელსაც ურტყამენ და ის არ ამბობს, პოლიციელი ვარ, მოვალეობას ვასრულებო?!“ - თქვა ადვოკატმა და დასძინა, რომ პროკურატურამ საქმეში არ ჩადო სრული ვიდეომასალა, რომელშიც გამოჩნდებოდა, როგორ ურტყამს ხელს პოლიციელი მირიან ქავთარაძე პოლიტიკოს თეონა ჭელიძეს. ადვოკატები აღნიშნავდნენ, რომ დემონსტრაციაზე მყოფ პოლიციელებს არ ჰქონდათ მაიდენტიფიცირებელი ნიშნები, ეკეთათ ნიღბები და არ პასუხობდნენ კითხვას, ვინ იყვნენ, იყვნენ თუ არა პოლიციელები. მათივე თქმით, პროკურატურის მოწმე არასწორად უთითებდა შემთხვევის ადგილს - „ქორთიარდ მარიოტის“ ნაცვლად, მიუთითეს მისგან ათობით მეტრით დაშორებულ „თბილისი მარიოტზე“. „როგორ უნდა ვენდოთ მათ ჩვენებებს?“ - იკითხეს ადვოკატებმა და ამ გამომძიებლის ჩვენების დაუშვებლად ცნობა მოითხოვეს. სხდომაზე სიტყვის უფლებით ისარგებლა საბა სხვიტარიძემ და მოსამართლეს და საქმის პროკურორს მიმართა: „ეს არის დიქტატურა, ეს არის უსამართლობა. არ ვიცი, რას გიხდიან ან რით გაშინებენ ახალგაზრდების ცხოვრების დანგრევისთვის და უკანონობის დაკანონებისთვის. თუმცა მოვა დრო და ხალხი გამოგიტანთ განაჩენს თითოეული თქვენი ქმედების გამო... დღეს მე შეიძლება დამაკავეს, მაგრამ ყველას ვერ დაგვიჭერთ, ქართველი ხალხი ევროპულ მომავალს არ დათმობს და არ დაიჩოქებს პოლიციური რუსული რეჟიმის წინაშე... თავისუფლება რეჟიმის ტყვეებს, თავისუფლება მზია ამაღლობელს!“ ასევე ნახეთ საბა სხვიტარიძე: მე შეიძლება დამაკავეს, მაგრამ ყველას ვერ დაგვიჭერთ, ხალხი ევროპულ მომავალს არ დათმობს მოსამართლე ხუჯაძემ მხარეების შეგროვებული ყველა მტკიცებულება დასაშვებად, თუმცა სადავოდ ცნო. სხვიტარიძის პატიმრობაში დატოვების გადაწყვეტილების გამოცხადებამდე კი წინასასამართლო სხდომა წესრიგის დაცვის მოტივით დახურა და დამსწრეები დარბაზიდან გაუშვა. მომდევნო სასამართლო სხდომა 11 თებერვალს გაიმართება. მოსამართლე ნატო ხუჯაძე საბა სხვიტარიძე ერთ-ერთია იმ 45 ადამიანს შორის, რომლებიც პროევროპულ აქციაში მონაწილეობდნენ და პოლიციამ სისხლი სამართლის წესით დააკავა. აქტივისტი საბა სხვიტარიძე 2024 წლის 5 დეკემბერს, გვიან ღამით, რამდენიმე საათით ადრე თავისუფლების მოედანზე მომხდარი დაპირისპირების გამო დააპატიმრეს. პროკურატურა ამტკიცებს, რომ ის ხელკეტით თავს დაესხა შინაგან საქმეთა სამინისტროს თანამშრომლებს და თავის არეში მიაყენა დაზიანება. პოლიციასა და მოქალაქეებს შორის დაპირისპირება მას შემდეგ...