ჩინური კომპანიის, DeepSeek-ის მიერ ხელოვნური ინტელექტის ახალი ჩატბოტის (ვირტუალური თანამოსაუბრე), R1-ის უფასოდ ამუშავებამ დიდი დანაკარგი მოუტანა უმსხვილეს ამერიკულ და ევროპულ ტექნოლოგიურ კომპანიებს და შეერთებული შტატების და ევროკავშირის საფონდო ბირჟებზე აჟიოტაჟი გამოიწვია. ჩინური R1 დასავლეთის კომპანიების ჩატბოტებზე გაცილებით იაფია და იგივე შესაძლებლობები აქვს. ტელეკომპანია CNN-ის ცნობით, ტექნოლოგიების ამერიკულმა კომპანია Nvidia-მ, რომელიც ხელოვნური ინტელექტის სფეროში ახალი თაობის მიკროჩიპებს აწარმოებს, 27 იანვარს 600 მილიარდი დოლარი დაკარგა. მისი აქციები დაახლოებით 18%-ით გაუფასურდა. სააგენტო Reuters-ის ცნობით, ევროპაში განსაკუთრებით დაზარალდა კომპანია Siemens Energy AG. მისი აქციები თითქმის 20%-ით გაუფასურდა. როგორც დასავლეთის მედიასაშუალებები წერენ, 27 იანვარს მომხმარებლების მიერ ჩინური R1-ის ჩამოტვირთვის მაჩვენებელმა გაუსწრო კონკურენტის, ამერიკული კომპანია OpenAl-ის ChatGPT-ს და აშშ-ში იქცა ყველაზე რეიტინგულ უფასო პროგრამად App Store-ში. სააგენტო AFP-ის ცნობით, 27 იანვარს DeepSeek-ზე კიბერშეტევა იყო, რის გამოც კომპანია იძულებული გახდა, დროებით შეეჩერებინა ახალი მომხმარებლების რეგისტრაცია. ასევე ნახეთ NPR: აშშ მუშაობს გეგმაზე, რომელიც ითვალისწინებს TikTok-ზე კონტროლის გადაცემას Oracle-ისთვის 2023 წელს დაფუძნებული ჩინური კომპანია DeepSeek-ი ირწმუნება, რომ ჩატბოტის შექმნა მხოლოდ 5,6 მილიონი დოლარი დაუჯდა მაშინ, როცა ამერიკული ტექნოლოგიური გიგანტები Nvidia, Meta და Alphabet-ი ასეულობით მილიონით მეტს ხარჯავენ. აშშ-ის პრეზიდენტმა დონალდ ტრამპმა DeepSeek-ის გარშემო შექმნილ აჟიოტაჟს საგანგაშო სიგნალი უწოდა და განაცხადა, რომ გასამარჯვებლად აუცილებელია სრული კონცენტრაცია კონკურენციაზე. 21 იანვარს ტრამპმა გამოაცხადა, რომ ხელოვნური ინტელექტის ინფრასტრუქტურის განვითარების მიზნით დაიწყება 500 მილიარდი დოლარის ღირებულების პროექტი Stargate. ...