"როგორ მოსალოდნელი იყო, საქართველოს დელეგაციის უფლებამოსილების ცნობის საკითხი საპარლამენტო ასამბლეაში გასაჩივრდა, ეს ნიშნავს, რომ ისინი დღეს კენჭისყრაში მონაწილეობას ვერ მიიღებენ და თუ დამტკიცდა, საერთოდ ვერ შეძლებენ ასამბლეის მუშაობაში მონაწილეობას", - დაწერა რადიო თავისუფლების ევროპის რედაქტორმა რიკარდ იოზვიაკმა სოციალურ ქსელში. ქართული დელეგაციისთვის უფლებამოსილების ცნობის საკითხი შვედმა დეპუტატმა ბორიანა ობერგმა დააყენა EPP-ის ჯგუფის სახელით. მას ასამბლეის 30-მა წევრმა დაუჭირა მხარი. "საქართველოს პარლამენტი არის პარლამენტი, რომელშიც მხოლოდ ერთი პარტიაა. ივანიშვილის რეჟიმი ანგრევს დემოკრატიულ წესრიგს საქართველოში. ეს არის მიზეზი, რის გამოც მე გავასაჩივრებ რწმუნებათა სიგელებს EPP ჯგუფის სახელით", - თქვა ობერგმა. როგორც ევროპის საბჭოს პრესცენტრი განმარტავს, საჩივარი მოსაზრების ანგარიშის მოსამზადებლად დებატების გარეშე გადაეცა მონიტორინგის კომიტეტსა და წესების კომიტეტს, ამ საკითხის განხილვა - და კენჭისყრა - კი ოთხშაბათისთვის, 29 იანვრისთვის, არის დაგეგმილი. ასამბლეაში "ქართული ოცნების" საპარლამენტო დელეგაციის უფლებამოსილების არცნობის თხოვნით ევროპის საბჭოს საპარლამენტო ასამბლეის პრეზიდენტს და საპარლამენტო ფრაქციებს საქართველოს სამმა ოპოზიციურმა გაერთიანებამ მიმართა. ისინი, "კოალიცია ცვლილებისთვის", "ერთიანობა ნაციონალური მოძრაობა" და "ძლიერი საქართველო", ითხოვდნენ, რომ ევროპის საბჭოს საპარლამენტო ასამბლეაში არ დადასტურდეს საქართველოს დელეგაციის უფლებამოსილება, "რადგან 2024 წლის 26 ოქტომბრის საპარლამენტო არჩევნები ჩატარდა სერიოზული დარღვევებით, რაც ეწინააღმდეგებოდა საერთაშორისო სტანდარტებსა და ქართველი ხალხის ნებას". ისინი მოითხოვდნენ "ყველა პოლიტიკური პატიმრის დაუყოვნებლივ გათავისუფლებას. ახალი, თავისუფალი და სამართლიანი არჩევნების ჩატარებას." "ევროპის საბჭოს საპარლამენტო ასამბლეის პრინციპული პოზიცია გადამწყვეტია დემოკრატიული ღირებულებების დასაცავად საქართველოში“, - ნათქვამი იყო მიმართვაში. ევროსაბჭოს საპარლამენტო ასამბლეაში საქართველოს დელეგაციას „ქართული ოცნების“ ერთ-ერთი ლიდერი თეა წულუკიანი ხელმძღვანელობს. სტრასბურგში გაემგზავრნენ ოპოზიციის წარმომადგენლებიც, რომლებიც არ მონაწილეობენ საქართველოს პარლამენტის მუშაობაში და მას არალეგიტიმურად მიიჩნევენ. "კოალიცია ცვლილებისთვის" ერთ-ერთი ლიდერის, ზურაბ ჯაფარიძის განცხადებით, სტრასბურგში შეხვედრები გამართეს ფრაქციების წარმომადგენლებთან და საქართველოში არსებული ვითარება გააცნეს EPP-ის, კონსერვატორების, სოციალისტებისა და ALDE-ს წევრებს. ჯაფარიძის თქმით, ALDE-თან შეხვედრაზე ცალკე დააყენეს "ბათუმელებისა" და &q...