პროტესტის მონაწილეების თქმით, პლაკატებზე “ქართული ოცნების” ხელისუფლების “60 დანაშაულია” დატანილი. სახელმწიფო რწმუნებულის ადმინისტრაციასთან პერფორმანსს პოლიციის უკმაყოფილება მოჰყვა. სამართალდამცავებმა აქციის მონაწილეებს არ მისცეს ბოძზე თოკის გაბმის და მასზე პლაკატების დაკიდების უფლება. მიზეზად დაასახელეს, რომ დამახინჯდებოდა შენობის მიმდებარე ტერიტორია, რითაც დაირღვეოდა ადმინისტრაციულ სამართალდარღვევათა კოდექსი. სიტყვიერი დაპირისპირების შემდეგ, აქციის მონაწილეებმა თოკი ხელში დაიჭირეს და ასე გამოფინეს პლაკატები. “ეს პერფორმანსი გამოხატავს იმას, რასაც წლების განმავლობაში ეწეოდა "ქართული ოცნება" ამ ქვეყანაში. აქ არის სამოცი დანაშაული, რაც ჩადენილია მათი მხრიდან…პოლიციამ არ მოგვცა ბოძზე თოკის გაბმის უფლება, რომლის სამართლებრივი საფუძველი მათ არ ჰქონდათ… ამიტომ ალტერნატიულ გზას მივმართეთ და ხელში დავიჭირეთ თოკი”, - უთხრა რადიო თავისუფლებას აქციის მონაწილემ, ორგანიზაცია “სამართლიანი არჩევნების” წარმომადგენელმა დათო ლოგუამ. „ქართული ოცნების 60 დანაშაული“ - ზუგდიდში პროტესტის მე-60 დღეს პლაკატები ჩამოკიდეს. “ადამიანის უფლებების მასობრივი დარღვევა”, “არჩევნების მასობრივი გაყალბება”, “პოლიტიკური ოპონენტების დევნა”, “პრორუსული საგარეო პოლიტიკა”, “მედიის შევიწროება” “აქციების სასტიკი დარბევა”, “კლანური მმართველობა სასამართლოში”, “კორუფცია”, “კრიმინალის ზრდა”, “პროკურატურის პოლიტიზება”, - ამ შინაარსის ტექსტებია დატანილი საპროტესტო პლაკატებზე. ახალი არჩევნების მოთხოვნით არ წყდება აქციები თბილისსა და სხვა ქალაქებში. პროტესტის ახალი ტალღა დაიწყო მას შემდეგ, რაც 2024 წლის 28 ნოემბერს „ქართულმა ოცნებამ“ თქვა, რომ მომდევნო ოთხი წლის განმავლობაში არ დააყენებდნენ ქვეყნის ევროკავშირში გაწევრიანების მოლაპარაკების საკითხს. პროევროპულ, მრავალრიცხოვან აქციებზე პოლიციამ იძალადა დემონსტრანტებსა და ჟურნალისტებზე. ამ დრომდე არცერთი მათგანი დაკავებული არ არის. თუმცა პოლიციამ ბოლო ორ თვეში სისხლის სამართლის წესით დააკავა 50-მდე ადამიანი, მათ შორის, ჟურნალისტი მზია ამაღლობელი, რომელიც საპატიმროში 15 დღეა შიმშილობს, მსახიობი ანდრო ჭიჭინაძე და სხვები. ...