„კაციას სასამართლოზე მოვისმინე ასეთი რამე, რომ კაციას ციხეში ავიწროებენ. სამი დღის მშიერია ბიჭი. საკვები როცა მიდის, მაინცდამაინც კაციაზე რომ არის გაცემა, მაშინ მთავრდება ეს საკვები. ჩარიცხულ თანხებს იყენებს მისი მესაკნე ვიღაც, რომელსაც ჰყავს დაჩაგრული და უკონტროლებს თითოეულ ჩეკს“, - თქვა მან რამდენიმე დღის წინ „მთავარი არხის“ ეთერში. ბრალდებული პენიტენციურ დაწესებულებაში მოინახულა სახალხო დამცველის წარმომადგენელმა. პრესსამსახურმა გავრცელებულ ინფორმაციაში აღნიშნა, რომ „ბრალდებულმა მიუთითა პენიტენციურ დაწესებულებაში მისი უფლებების დარღვევის ფაქტებზე, რაზეც სახალხო დამცველმა მოახდინა შესაბამისი სამართლებრივი რეაგირება“. მოგვიანებით რადიო თავისუფლებას ომბუდსმენის აპარატში უთხრეს, რომ კაციას კონკრეტული საჭმელი „რამდენჯერმე არ შეხვდა“. იმის მიუხედავად, რომ სახალხო დამცველის აპარატი კაციას კვებასთან დაკავშირებით არსებულ პრობლემებზე მიუთითებდა, პენიტენციურ სამსახურში აცხადებენ, რომ „ბრალდებული ნ.კ. სრულად არის უზრუნველყოფილი საკვებითა და შესაბამისი ჰიგიენური ნორმებით... მოვუწოდებთ დეზინფორმაციის გამავრცელებლებს, რომ თავი შეიკავონ გადაუმოწმებელი და ცრუ ინფორმაციის გავრცელებისგან“. კაცია 2024 წლის 7 დეკემბერს, საღამოს საათებში, სახლიდან აქციისკენ მიმავალი ტაქსიში დააკავეს. მას 20 წლამდე ან უვადო პატიმრობა ემუქრება, რადგან განსაკუთრებით დიდი ოდენობით ნარკოტიკული საშუალების შეძენა-შენახვას ედავებიან. ასევე ნახეთ ნიკოლოზ კაცია პატიმრობაში დატოვეს პოლიციამ ჯამში პროევროპული აქციების 45 მონაწილე დააკავა სისხლის სამართლის წესით. ახალი არჩევნების ჩატარებისა და დაკავებულთა გათავისუფლების მოთხოვნით პროტესტი არ წყდება. ...