დაცვის თანამშრომლებმა შეანგრიეს სტუდენტების მიერ სავარძლებით გაკეთებული ჯებირები. მათ შორის იყვნენ როგორც თსუ-ს უსაფრთხოების სამსახურის, ასევე კერძო კომპანია "ვიქტორია სექიურითის" წარმომადგენლები. ბარიკადების მოხსნის შემდეგ შენობაში შესულ დაცვას სტუდენტებმა წინააღმდეგობა გაუწიეს, რასაც მოჰყვა ხმაური და შეხლა-შემოხლა, თუმცა საბოლოოდ სტუდენტები იძულებული გახდნენ, დაეტოვებინათ ტერიტორია. "მე ოთხმა ადამიანმა მიმიმწყვდია კუთხეში, ყველა სხვადასხვა მხარეს მექაჩებოდა. იყო მცირე დაზიანებებიც, სიტყვიერი შეურაცხყოფებიც, თუმცა მაქსიმალურად მოვერიდეთ მათთან დაპირისპირებას. ამის შემდეგ გავაკეთეთ განცხადება და დავტოვეთ ტერიტორია, რათა მოგვეფიქრებინა ჩვენი შემდეგი ნაბიჯები, ფუნქციური წნეხის გაგრძელება", - უყვება რადიო თავისუფლებას მესამე კურსის სტუდენტი, "მაისის სტუდენტური მოძრაობის" წარმომადგენელი საბა თოდუა. три თსუ-ში ახლა საგამოცდო პერიოდია. როგორც თოდუა ამბობს, დაცვის წარმომადგენლები "მაისის სტუდენტური მოძრაობის" წევრებს შენობის დატოვებას სთხოვდნენ არგუმენტით, რომ გარეთ შეკრებილ სხვა სტუდენტებს გამოცდების დაწერის შესაძლებლობა არ ეძლეოდათ. თოდუას თქმით, სტუდენტებთან საუბრის შესაძლებლობა თავად მათ არ მისცემიათ. "ჩვენთან მანიპულირებდნენ [დაცვის სამსახური], რომ შენობის დაკავება არ შეიძლება, რადგან სტუდენტებს სურდათ გამოცდების წერა. თუმცა სად ჩანდა ეს? პირიქით, სტუდენტები სოლიდარულები იყვნენ. სტუდენტები რომ შემოვიდნენ, ჩვენ მათთან არ გვისაუბრია იმ ტონით, რომ როგორ შეგიძლიათ გამოცდები წეროთ და ა.შ. ჩვენ სხვაგვარი საუბარი გვჭირდება მათთან. იმ ადგილის დაკავება და ბარიკადები წარმოადგენდა ფუნქციურ წნეხს და არა მხოლოდ მორალურს. ეს იყო ერთგვარი მცდელობა, რომ სტუდენტური პროტესტი ახალ საფეხურზე გადასულიყო და ახლა როგორც ვაკვირდები გამოხმაურებებს, სწორად არის აღქმულიც", - ჰყვება თოდუა. три თსუ-ს პრესსამსახურის განმარტებით, "ვიქტორია სექიურითთან" უნივერსიტეტს სატენდერო ხელშეკრულება აქვს და საჭიროების შემთხვევაში, დამატებით ხდება მისი მობილიზება. პრესსამსახურის ცნობით, დანარჩენთან დაკავშირებით თსუ-ს აკადემიური საბჭო განცხადებას მოგვიანებით გაავრცელებს. სტუდენტური მოძრაობის წევრებმა ბიბლიოთეკის შენობა, სადაც გამოცდები ტარდება, გუშინ 22 იანვარს დაიკავეს. ისინი სახელმწიფოსგან ითხოვენ, გათავისუფლდნენ პროევროპულ აქციებთან დაკავშირებით დაკავებული ადამიანები, აშენდეს სტუდენტური საერთო საცხოვრებელი, თსუ-ში სწავლის გადასახადი გაუქმდეს და გაუმჯობესდეს განათლების ხარისხი. ...