„ამოღებულია ორი მინის ბოთლი მასში სავარაუდოდ განთავსებული ნავთობპროდუქტით. მას ედავებიან, რომ ეს ჰიპოთეზურად იყო „მოლოტოვის კოქტეილი“ და რომ მას ჰქონდა მიზანი, რომ ეს გამოეყენებინა პოლიციელების წინააღმდეგ... ექსპერტმა დაწერა, რომ იმ ფორმით, რა ფორმითაც ის ამოიღეს ზურგჩანთიდან, არ იყო აალებადი ნივთიერება. ასეთად რომ ქცეულიყო, სჭირდებოდა დამატებითი ზომების მიღება. ზურგჩანთიდან არ ამოუღიათ ნივთიერება, რომელიც ცეცხლს ანთებს“, - თქვა დავით ხომერიკის ადვოკატმა ანა გახოკიძემ. ადვოკატები საქმის წარმოების შეწყვეტას ითხოვდნენ, რადგან მიაჩნიათ, რომ მათი დაცვის ქვეშ მყოფი უდანაშაულოა. პროკურატურამ მას ბრალდება წაუყენა აფეთქების მომზადების (სისხლის სამართლის კოდექსის 18-229-ე) მუხლით, რისთვისაც ოთხიდან შვიდ წლამდე პატიმრობაა გათვალისწინებული. დავით ხომერიკი წაყენებულ ბრალს არ აღიარებს. თითქმის ორი თვეა, საქართველოში უწყვეტად იმართება პროევროპული აქციები ახალი არჩევნების ჩატარებისა და აქციებზე დაკავებული ადამიანების გათავისუფლების მოთხოვნით. მოქალაქეები ასევე აპროტესტებენ 2024 წლის 28 ნოემბერს „ქართულ ოცნებაში“ მიღებულ გადაწყვეტილებას, რომლის მიხედვითაც, მომდევნო ოთხი წლის განმავლობაში დღის წესრიგში აღარ დააყენებენ ევროკავშირთან გაწევრიანებისთვის მოლაპარაკების გახსნის საკითხს. ბოლო ორი თვის განმავლობაში პოლიციამ იძალადა აქციის არაერთ მონაწილეზე, მათ შორის ჟურნალისტებზე, რომლებიც პროცესებს აშუქებდნენ. ამ დრომდე არცერთი მათგანი დაკავებული არ არის. პოლიციამ 28 ნოემბრის შემდეგ სისხლის სამართლის წესით 45 ადამიანი დააკავა. მათ რამდენიმეწლიანი პატიმრობა ემუქრებათ. ...