რუსთაველის გამზირზე, აქციის დაშლისას დაკავებული ჟურნალისტი და ტელეწამყვანი ბექა ყორშია, სამართალდამცავებმა გამთენიისას გადაიყვანეს ზაჰესის დროებითი მოთავსების იზოლატორში. ინფორმაციას ტელეკომპანია „მთავარი არხი” ავრცელებს. მათი ცნობით, ბექა ყორშია ადმინისტრაციული წესითაა დაკავებული. ტელეკომპანიაში ამბობენ, რომ ბექა ყორშია იმ დროს დააკავეს, როცა ის სხვას ეხმარებოდა. ტელეკომპანიის მიერ გავრცელებულ კადრებში ჩანს, როგორ გადაჰყავთ ბექა ყორშია ზაჰესის იზოლატორში. ვიდეოკადრებში ისმის კითხვები ბექა ყორშიას მისამართით: - კარგად ხარ? რაზეც ის პასუხობს - კი, კარგად ვარ. - ხომ არ დაგარტყეს? ამ კითხვაზე ბექა ყორშია ხელს იქნევს უარყოფის ნიშნად. ბექა ყორშია ჯერ არ შეხვედრია ადვოკატს. renderExternalContent("https://www.youtube.com/embed/fMIj8MAgfMA?&&&fs=1&enablejsapi=1") ბექა ყორშიას დაკავებას სპეციალური განცხადებით ეხმაურება "მთავარი არხი": დღეს გამთენიისას საპროტესტო აქციაზე გაიტაცეს და დააკავეს „მთავარი არხის“ ჟურნალისტი და წამყვანი ბექა ყორშია. "მთავარი არხის" გუნდი დიდი ხანია არის "ქართული ოცნების" ანგარიშსწორების სამიზნე. მიმდინარე პერიოდში განსაკუთრებულად გაზრდილია აგრესია მედიის მიმართ და ღიად, დემონსტრაციული მეთოდებით ხდება ჟურნალისტებზე თავდასხმა. ეგრეთწოდებული სამართალდამცავი ორგანოები მიზანმიმართულად აყენებენ ფიზიკურ და სიტყვიერ შეურაცხყოფას მედიის წარმომადგენლებს და ხელს უშლიან პროფესიულ საქმიანობაში. მოვუწოდებთ ივანიშვილის არალეგიტიმურ ხელისუფლებას, დაუყოვნებლივ გაათავისუფლოს "მთავარი არხის" ჟურნალისტი და წამყვანი ბექა ყორშია და გამოიძიოს მისი უკანონო დაკავების ფაქტი", - წერია განცხადებაში. ცხრა ღამეა თბილისსა და სხვა ქალაქებში დემონსტრაციები იმართება. მოქალაქეები ხელისუფლების გადადგომას ითხოვენ პრემიერ-მინისტრის 28 ნოემბრის განცხადების გამო. ისინი ითხოვენ ხელახალი საპარლამენტო არჩევნების ჩატარებასაც. „ქართულ ოცნებაში“ გადაწყვიტეს, რომ 2028 წლის ბოლომდე დღის წესრიგში არ დააყენონ ევროკავშირთან საქართველოს წევრობაზე მოლაპარაკების გახსნის საკითხი და 2028 წლის ბოლომდე უარს ამბობენ ევროკავშირის საბიუჯეტო გრანტებზე.​ აქციების მეცხრე ღამეს საპოლიციო ძალებმა კვლავ ძველ ხერხს მიმართეს. თუკი მეშვიდე და მერვე ღამეს, რუსთაველის გამზირზე არ გამოჩენილა სპეცრაზმი და წყლის ჭავლის მანქანა, მეცხრე ღამეს, დემონსტრანტების დასაშლელად ისევ გამოიყვანეს განსაკუთრებული დაცვის დეპარტამენტის თანამშრომლებმა წყლის ჭავლის მანქანა და ცრემლსადენი აირი. 6 დეკემბრის მონაცემებით, პროევროპულ აქციებზე, რვა დღის განმავლობაში, ადმინისტრაციული სამართალდარღვევისთვის დაკავებულია 338 პირი. სპეცრაზმის თანამშრომლებმა რამდენიმე დემონსტრანტი დააკავეს...