რუსეთის ჩეჩნეთის რესპუბლიკაში, გროზნოს რაიონის პეტროპავლოვსკაიას სადგურზე, უცნობმა პირებმა ცეცხლი გაუხსნეს რუსეთის ეროვნული გვარდიის სატვირთო მანქანას. ეს ცნობა პირველად გაავრცელეს რუსეთის საზღვრებს გარეთ მყოფმა ჩეჩენმა ოპოზიციონერებმა, მოძრაობა NIYSO-ს წევრებმა. მათი მონაცემებით, თავდასხმის შედეგად დაიღუპა რუსეთის სამი სამხედრო მოსამსახურე. მოგვიანებით, თავდასხმის შესახებ ინფორმაცია დაადასტურა მთავრობის მომხრე ტელეგრამის არხმა Mash-მა, თუმცა მას განსხვავებული მონაცემები მოაქვს - კერძოდ, აღნიშნავს, რომ დაიღუპა ერთი და დაიჭრა ერთი ადამიანი. Mash-ის ცნობითვე, დაცხრილული სატვირთო მანქანა "ურალი" ეკუთვნის რუსეთის ეროვნული გვარდიის 46-ე ოპერატიულ ბრიგადას, რომელიც ურუს-მარტანშია დისლოცირებული. გავრცელებული ცნობებით, თავდამსხმელებმა გაქცევა მოახერხეს და მათ ეძებენ. ოქტომბრის დასაწყისში ჩეჩნური ოპოზიციური მოძრაობა 1ADAT-ის აქტივისტები აცხადებდნენ, რომ საგზაო პატრულის სადგურზე თავდასხმის შემდეგ გუდერმესში რეიდები ტარდება. რესპუბლიკის ხელისუფლებას ამ ინფორმაციაზე განცხადება არ გაუკეთებია. ასევე ნახეთ კადიროვი „სისხლის აღებით“ იმუქრება - მკვლელობის მცდელობები და დავა რუსულ „ამაზონზე“ ...