სამშაბათს უკრაინის ქალაქ პოლტავაში, სამხედრო სასწავლებელზე განხორციელებული დარტყმის შედეგად დაღუპულთა რაოდენობამ 55-ს მიაღწია, დაჭრილია 328 ადამიანი. ამის შესახებ უკრაინის საგანგებო ვითარებათა სამსახური იტყობინება. „სასწავლო კორპუსის ექვსსართულიანი შენობა ნაწილობრივ დანგრეულია. სავარაუდოდ, ნანგრევების ქვეშ ჯერაც არიან ადამიანები. ამ მომენტისთვის მაშველებმა დაშალეს და გაიტანეს 2000 ტონა სამშენებლო ნაგავი,“ ნათქვამია საგანგებო ვითარებათა სამსახურის ცნობაში. სამძებრო-სამაშველო სამუშაოები გრძელდება. უკრაინის თავდაცვის სამინისტროს ცნობით, 3 სექტემბერს პოლტავაში კავშირგაბმულობის ძალების სასწავლო ცენტრის შენობაზე დარტყმა ორი ბალისტიკური რაკეტით განხორციელდა. ასევე ნახეთ რუსეთის თავდაცვის სამინისტრომ დაასახელა პოლტავასა და ლვოვზე განხორციელებული თავდასხმის სამიზნეები რუსეთის თავდაცვის სამინისტროს თანახმად, რუსეთის შეიარაღებულმა ძალებმა "მაღალი სიზუსტით დაარტყეს" უკრაინის შეიარაღებული ძალების 179-ე ერთობლივ სასწავლო ცენტრს ქალაქ პოლტავაში. სადაც მათი მტკიცებით, უცხოელი ინსტრუქტორები ამზადებდნენ კავშირგაბმულობისა და რადიოელექტრონული საშუალების უკრაინელ სამხედრო სპეციალისტებს და დრონების ოპერატორებს რუსეთის ქალაქებში სამოქალაქო ინფრასტრუქტურაზე თავდასხმისთვის. ...